Алматы әуежайында мысық чемодандармен бірге берілді полиция тексерісті бастады

Алматы әуежайында мысық тасымалдауға қатысты жазба көлік полициясының тексеру жүргізуіне себеп болды. Жануар иесінің айтуынша, үй жануары салынған тасымалдау қорабы жүк таспасында чемодандармен бірге шыққан, деп хабарлайды Tengri Travel.

Алматы әуежайында мысық тасымалдауға қатысты жазба көлік полициясының тексеру жүргізуіне себеп болды. Жануар иесінің айтуынша, үй жануары салынған тасымалдау қорабы жүк таспасында чемодандармен бірге шыққан, деп хабарлайды Tengri Travel.

Мән-жайы

Оқиға қазақстандық әйелдің ұшудан кейін үй жануарын қалай алғанын егжей-тегжейлі сипаттаған эмоционалды жазбасынан басталды.

"Бүгін менің мысығымды жүк таспасынан берді, ол жерде чемодандар шығып, бір-бірінің үстіне құлап жатады. Мысығым салынған қорап та таспаға шығып, бірнеше рет аударылып кетті, ал қызметкерлер мен айналадағы адамдар бұл сұмдыққа таңғала қарап тұрды. Бұл жүк емес, тірі жан иесі ғой. Жануарларға қалайша бұлай салғырт қарауға болады? Мысық қатты күйзеліске түсті, ал мен мұндай "қызметтен" есеңгіреп, ашуланып отырмын, бұл масқара. Егер жануар тасымалдау жауапкершілігін алсаңыздар, оларға адамгершілікпен қарауды үйреніңіздер", - деді жазба авторы.

Скриншот: Threads

Бұл жазба қызу талқыға түсті. Желі қолданушылары жануарларды тасымалдауға әуе компаниясы ма, әлде әуежай қызметкерлері ме, нақты кім жауап беретіні туралы пікірталастырып, өз бастарынан өткен ұқсас оқиғаларын бөлісті.

"Бұл қауіпсіздікті анық бұзу, жануарға қатыгездік көрсету. Осы іске қатысы бар қызметкерлерді тауып, айыппұл салып қана қомай, жазалау керек"; "Біз де қыста Өскеменнен Алматыға келетін мысықты күттік, рейс кешіктірілді, қатты уайымдадық. Сөйтсек, стюардесса қыздар жануар қиналмасын деп аяп, қорапты өздерінің салондарына алып алыпты. Жақсы адамдар барлық жерде бар"; "Мысық тасымалдадым, ол да жүк бөлімінде болды. Оны жүктерден бөлек шығарды, қызметкерлер иесі алып кеткенше қасында күтіп тұрды. Оның өзінде мысық күйзелісте болды, ал мынау енді сұмдық"; "Жүктеу және түсіру жұмыстарымен әуежай қызметкерлері айналысады. Сол жерде бірден жүк бөлімінің іс-әрекетіне шағым жазып, әуе компаниясының өкіліне хабарлау керек еді". Полиция не деді?

Біз Алматы әуежайынан пікір білдіруді сұрадық, алайда материал жарияланған сәтте жауап ала алмадық.

Бұл ретте көліктегі полиция департаментінің баспасөз қызметі жазба дерегі бойынша тексеру жүріп жатқанын хабарлады.

"Аталған дерек бойынша Алматы әуежайындағы Көліктегі полиция басқармасы тексеру жүргізіп жатыр. Оның нәтижесі бойынша заңнамаға сәйкес құқықтық баға беріледі", - деді ведомство өкілдері.

Қазақстанда жануарларды тасымалдаудың қандай ережелері қолданылады?

Қазақстанда ережелер әуе компаниясына байланысты әртүрлі. Тасымалдаушыларда салмақ бойынша шектеулер бар.

Air Astana

Air Astana-да салонға тасымалдау қорабымен бірге салмағы 8 келіге дейінгі кішкентай жануарлар жіберіледі. Егер үй жануары ауыр болса, ол жүк бөлімінде тасымалданады.

Рұқсат етілген максималды салмақ - контейнермен бірге 50 келіге дейін.

FlyArystan

FlyArystan компаниясында ережелер ұқсас. Салонда мыналарды тасымалдауға болады:

мысықтарды; кішкентай иттерді; тасбақаларды;

егер тасымалдау қорабымен бірге жалпы салмағы 8 келіден аспаса. Салмағы 50 келіге дейінгі ірі жануарлар багаж бөлімінде ұшады.

Scat

Scat компаниясында ережелер қатаңырақ.

Үй жануарларын салон ішінде тасымалдауға рұқсат берілмейді. Ерекшелік - көру немесе есту қабілеті бұзылған жолаушыларға серік болатын жетекші иттер.

Басқа барлық жануарлар тек багаж бөлімінде тасымалданады. Рұқсат етілген максималды салмақ - 50 келіге дейін.

Неге үй жануарымен ұшу әрқашан стресс

Жануарлар үшін ұшу жай ғана сапар емес, үлкен жүктеме.

Шу, қысымның өзгеруі, бейтаныс орта және иесінен айырылу қатты стресске себеп болуы мүмкін.

Ұшу әсіресе мыналарға ауыр тиеді:

кәрі жануарлар; күшіктер мен марғаулар; тыныс алу жолдарында ақауы бар тұқымдар; мазасыз үй жануарлары.

Айта кетейік, жануарларды тасымалдау тақырыбы қазақстандық жолаушылар үшін өзекті мәселе болып отыр. Биылғы наурызда Алматы - Ақтау рейсінің жолаушысы ұшаққа міне алмады. Иесінің айтуынша, тиеу кезінде жарамды контейнердің "тас талқанын шығарған": темірі майысып, сынып қалғандықтан, итті ұшаққа кіргізуден бас тартқан.

Өз жазбасында ол өтемақы төлеуден бас тартылып, ұшу уақытын айыппұлмен қайта брондауды ұсынғанын айтты. Жалғыз ұшпаған қазақстандық әйелге Алматыда қалуға тура келген.

Тағы бір атышулы оқиға 2024 жылдың қазанын болды. Қазақстандық Екатерина Барлас Стамбулдан Астанаға ұшу кезінде мысығынан айырылып қалды. Жануарды салонға кіргізбегендіктен, иелері үй жануарын багаж бөліміне тапсыруға мәжбүр болған.

Куәгерлердің айтуынша, жүк түсіру кезінде тасымалдау қорабы құлап, ашылып кеткен және үріккен мысық қашып кеткен. Үй жануары сол күйі табылмады.

Екатерина Барластың жеке мұрағатынан алынған фото

Ұшу алдында не істеу маңызды?

Тәуекелді азайту үшін жануар иелері алдын ала мыналарды тексеруі керек:

нақты әуе компаниясының талаптары; тасымалдау қорабының өлшемдері мен түрі; ветеринарлық құжаттар; тұқымы мен салмағы бойынша шектеулер; салонда немесе жүк бөлімінде тасымалдау шарттары.

Google News арқылы жаңалықтарымызды қадағалаңыз

Жазылу