Жаркентте Жамбыл орта мектебіне күрделі жөндеу қажет

Жаркентте Жамбыл орта мектебіне қосалқы ғимарат және күрделі жөндеу қажет. Себебі 1973 жылы салынған ғимарат әбден ескірген. Әрі бала саны да көп. 

Тынышхан Кәбенованың Жамбыл атындағы орта мектепте балалары білім алған. Қазір немерелері оқиды. «Ұрпағының болашағына алаңдаған әже оқу орнын кеңейту керек», - дейді.

Тынышхан Кәбенова, Жаркент қаласының тұрғыны:

- Қазіргі заманға сай үлкен мектеп салынса, оқу сапасы да, оқу барысы да жақсаратын еді. Бәрі жақсы болатын еді. Сол себепті жаңа мектеп қажет. 

Әбдімұрат Раев, Жаркент қаласының тұрғыны :

- Мектептің ата-аналар қауымдастығы, әкелер қауымдастығы атынан біздің өтінішіміз:бізге осы мектебімізді күрделі жөндеуден өткізіп берсе, мүмкін болса қосымша блок салып берсе. 

Қала тұрғындарының бұлай деп мәселе көтеруіне негіз бар. Себебі 900 оқушыға арналған мектепте қазір 1800-ден астам бала біліп алып жатыр. Әсіресе төменгі сыныптағылардың саны жыл сайын артып келеді. 

Гүлвира Муфтахтинова, Жамбыл атындағы орта мектептің директоры:

- Балалар екі сменде оқытылып жатыр. Кабинеттер жеткілікті. Бастауышта 33 сынып бар. Бұл өзіміздің ауданымызды толықтай қамтып отырмыз. Алайда мектепке келетін оқушылар өте көп. 

«Жарты ғасыр бұрын салынған мектеп 2010 жылы күрделі жөндеуден өтті», - дейді аудандық білім бөлімінің басшысы Қайсар Сейітқожаев. Сала жетекшісі тұрғындар талабы енді орындалады деп отыр. 

Қайсар Сейітқожаев, Панфилов аудандық білім бөлімінің басшысы:

- Жамбыл атындағы орта мектебін күрделі жөндеу, жапсарлама құрылысы жоспарланған. Ол жасалады. Сонымен қатар аудандағы Елітінді батыр мектебі, Кіші шыған атындағы орта мектебі жобалық сметалық құжаттары жасалып, экспертизадан шығарлыған болатын. Соңғы екі жылда үш мектепті күрделі жөндеуден өткіздік. Үш мектеп жаңа салынып қолданысқа берілді.

Облыс құрылғалы аудан-қалаларда 22 мектеп толық жаңартылып, ел игілігіне берілген.

Шыңғыс Қалиден, тілші:

-2022 жылдан бері Жетісу облысында 17 білім ошағы бой көтерді. Сонымен қатар екі «Келешек мектебі» салынды. Нәтижесінде 6 мыңнан аса оқушының сапалы білім алуына қолайлы жағдай жасалды. 

Авторлары: Шыңғыс Қалиден, Қуаныш Түргенбаев