Павлодар әуежайына күрделі жөндеу жүргізіледі

АСТАНА, 4 қаңтар – Sputnik. Қайтарылған активтер есебінен Павлодар әуежайы жаңғыртылады, деп хабарлады үкімет.

Жоба аясында жасанды ұшу-қону жолағы, бұру-қозғалу жолы, перронды реконструкциялау жұмыстарын жасалады.

"Жоба Арнаулы мемлекеттік қор есебінен қаржыландырылады. Үкімет бұл мақсатқа 9,3 млрд теңге бөлді", - дейді ведомствода.

Нәтижесінде ұшу салмағы бойынша шектеусіз әуе кемелерінің заманауи түрлерін қабылдауға мүмкіндік болады.

"Павлодардың географиялық орналасуын ескерсек, бұл өңірдің транзиттік әлеуетін арттырады. Инфрақұрылымды жаңарту сонымен бірге, облыстың көлік қолжетімділігін жақсартуға, жолаушылар ағынын арттыруға және іскерлік белсенділікті дамытуға ықпал етеді деп күтілуде", - дейді үкіметте.

Жобаның негізгі мақсаты – әуежай параметрлерін халықаралық ICAO стандарттарының талаптарына сәйкестендіру.

Жоспарлы жұмыстың негізгі түрлеріне мыналар жатады:

Ұшу-қону жолағын 45 метрден 60 метрге дейін реконструкциялау және кеңейту;

Бұру-қозғалу жолы мен перронды жаңарту;

Энергиямен жабдықтау жүйесін жаңғырту;

Периметрі бойынша жарықпен сигнал беру жабдықтары мен бейнебақылау жүйесін орнату.