Атырау Орал тас жолына жөндеу жүргізіледі

Биыл «Атырау-Орал» автомагистралі орташа жөндеуден өтеді.  

Ұзындығы 500 шақырым тас жолдың 184 шақырымы Атырау облысының 2 ауданы арқылы өтіп, 10 елді мекенді байланыстырады. Батыс өңіріндегі маңызды көлік дәлізі 2003 жылдан бері жөндеу көрмеген. Ескірген жолдың қиындығын жүргізушілер мен жолаушылар көріп жүр. Осыған орай биыл Үкіметтің кепілдігімен «Қазақстан даму банкінен» 50 млрд теңге бөлінді.  

Тас жолдың Атырауға кіретін 15 шақырымы былтыр ағымдағы жөндеуден өтті. Ендігі мәселе Индер кенті мен Алмалы ауылына дейінгі аралық. 2024 жылғы тасқын кезінде бұл жол 8 жерден жырылып, жарамсыз болып қалған еді. Бүлінген жолды ретке келтіргенмен әлі де кедір-бұдыры бар, дейді жүргіншілер.

Бектұр Төлегенұлы, жүргізуші: 

- Жалпы жолдың жағдайы өте нашар. 2-3 рет барып келгенде машинамыз сыр беріп жатады. Осы жолдың жөнделгенін күтеміз. 

Азамат Жаманқұлов, жүргізуші:  

- Индерден Махамбетке дейінгі жолдың сапасы өте нашар. Махамбеттен бері қарай Атыраудың арасы жақсы. Ремонт керек Индер мен Махамбеттің ортасына жолдың шоқалағы шұңқырлары өте нашар. 

Жүргізушілердің сөзінің жаны бар. 20 жылдан астам уақыт жөндеу көрмеген күрежол тозған. Оның үстіне жыл сайын көлік ағыны артып келеді. Себебі, жол бойындағы аудандардан өзге Орал арқылы еліміздің батыс шекарасына қатынайтын жүк тасымалында тыным жоқ.  

Арыстанбек Кенже, тілші: 

- Республикалық маңызы бар бұл автомагистральмен тәулігіне 4 мыңдай жеңіл көлік және жүздеген жүк көліктері өтеді. Оның ішінде салмағы 40 тоннадан асатын алып автомашиналар да бар. 

Аслан Дүйсенов, "Жол активтері сапасының ұлттық орталығы" РМК Атырау филиалының директоры:  

- Бұл 3-техникалық санаттағы жол болса, онда 3 мың автомобиль тәулігіне жүру керек. Жүк көліктерінің әрбір оське түсетін салмағы 8-10 тоннаға есептелген. Ал қазір жүріп жатқандар одан көп. 13-15 тоннаға дейін, оське түсетін салмақ. Содан бұзылады.  

Биыл наурыздан бастап, автомагистриалды жөндеу басталады. Құрылыс 90 және 94 шақырымдық екі учаскеге бөлініп, қатар жүргізіледі. Бүгінде жобаға қажет 50 млрд теңге бөлінді. Жобалық-сметалық құжаты дайын. Енді мердігерлер анықталғасын жолшылар іске кіріседі.  

Ардақ Қайырденов, "Қазавтожол" ҰК АҚ Атырау филиалының директоры: 

- Жалпы жөндеу жұмыстары 2026-2027 жылдары аяқталады деп жоспарлап отырмыз. Жол 8 метрлік енімен осы қазіргі күйінде қалады, себебі орташа жөндеу жұмыстары. Алдағы уақытта, перспективада осы жолды бірінші категорияға өткізіп, 4 жолақты жолға ауыстыратын жобалау жұмыстары қазір басталды. 

3-санатты жол құрылысында барлық техникалық ереже сақталады. Оны арнайы мекеме бақылауға алады, дейді мамандар.  

Аслан Дүйсенов, "Жол активтері сапасының ұлттық орталығы" РМК Атырау филиалының директоры:  

- 25 см ресайкілеу қабаты. Оның цементі арасына стабилизаторын қосып, сосын үстінен 2 қабатты асфальт-бетон жұмыстары жасалады. Ал біздің мекеме, Ұлттық сапа орталығы осылардың барлығының сапасын тексереміз.   

Сондай-ақ биыл облыста 90 шақырымдық «Атырау-Доссор» автокөлік жолында да жөндеу жұмыстары басталады. Осы екі жоба толық жүзеге асқанда, «Орал-Атырау-Ақтау» күре жолы арқылы жолаушылар мен көлік қатынасы жаңа деңгейге көтеріледі. 

Арыстанбек Кенже, Амантай Мәтенов, Жандос Рахметуллин