Атырауда экология департаменті ғимаратының күрделі жөндеу жұмыстары аяқталды

Күрделі жөндеу жұмыстары облыстық құрылыс, сәулет және қала құрылысы басқармасының тапсырысы бойынша, соның ішінде құрылыс жұмыстары экологиялық айыппұлдардан түскен қаражат есебінен жүзеге асырылды, деп хабарлайды Өңірлік коммуникациялар қызметі. 

Ашылу салтанатына облыс әкімінің орынбасары Жасұлан Бисембиев қатысып, мекеме қызметінің маңыздылығын атап өтіп, ұжымды жаңарған ғимараттың ашылуымен құттықтады, деп хабарлайды Өңірлік коммуникациялар қызметі.

Департаменттің зертханалары толығымен заманауи жабдықтармен жабдықталған. Бұл экологиялық мониторинг сапасын арттыруға, сондай-ақ ауаның, топырақтың және судың құрамын тура және жедел зерттеуге мүмкіндік береді. Сонымен қатар, ғимаратта ас үй мен демалыс бөлмелері қарастырылған, бұл мамандардың төтенше жағдайларда үздіксіз жұмыс істеуіне қолайлы жағдай жасайды. Сондай-ақ, департаменттің зертханалық-талдау бақылау бөлімінің балансындағы жылжымалы мобильді зертханалық кешен жаңартылды.

- Жаңа ғимараттағы қолайлы еңбек жағдайлары мен заманауи жабдықтар экологиялық сараптамаларды айтарлықтай жылдам және сапалы жүргізуге мүмкіндік беретініне сенімдімін, бұл өз кезегінде шара қабылдауды жеделдетіп, экологиялық кемшіліктерге уақтылы әрекет етуді қамтамасыз етеді, - деп атап өтті облыс әкімінің орынбасары Жасұлан Бисембиев.

1978 жылы салынған департамент ғимараты толық жаңғырту үшін өткен жылы берілген болатын, ал құрылыс жұмыстары 2025 жылдың желтоқсанында аяқталды. Жаңғырту жұмыстары аясында департаменттің барлық негізгі материалдық-техникалық базасы толығымен жаңарды.

Бүгін, 19:02