Жарыққа ма, әлде бәріне ме? Атырауда 693 миллион теңгеге келісімшарт жасалды

Бұл сомаға «Атырау Жарық» ЖШС-мен келісімшарт жасалған, алайда құжаттағы тұжырымдар бұл шығындардың нақты неге жұмсалатынына қатысты сұрақ тудырып отыр. 

Мемлекеттік сатып алу порталындағы аталған келісімді «АЖ» редакциясы анықтады. Тапсырыс беруші — қалалық тұрғын үй-коммуналдық шаруашылық және тұрғын үй инспекциясы бөлімі, оның атынан басшының міндетін уақытша атқарушы Эдуард Оспанов әрекет етеді. Мердігер ретінде «Атырау Жарық» ЖШС көрсетілген, келісімшартқа өткізу департаментінің басшысы Тұрлан Дошатов қол қойған.

Келісімшарттың жалпы сомасы 693 миллион теңгені құрайды, оның ішінде ҚҚС (НДС) — 95 миллион 586 мың теңге. Келісімшарттың қолданылу мерзімі 2026 жылдың 31 желтоқсанына дейін белгіленген. Құжатқа 27 ақпанда қол қойылып, соңғы өзгерістер 2 сәуірде енгізілген.

Бұл ретте қысқаша сипаттамада нақты бағыттарға бөлместен, жалпы энергиямен жабдықтау қызметтері туралы айтылған. Сипаттамада электрмен жабдықтау, жылу энергиясы және ыстық сумен қамтамасыз ету тізіп көрсетілген.

Техникалық ерекшелікте мемлекеттік бюджеттен қаржыландырылатын заңды тұлғаларға арналған электрмен жабдықтаудың үлгілік шарты, сондай-ақ коммерциялық есепке алу аспаптарының тізбесі және электр энергиясын жеткізуге алдын ала өтінім берілген.

Осылайша, құжаттамада соманың қандай бөлігі қаланы көше жарығымен қамтамасыз етуге тиесілі екені және оған қандай жұмыстар немесе қызметтер кіретіні туралы тікелей нұсқау жоқ.

Тексеру кезінде порталда аталған келісімшарт бойынша жүргізілген төлемдер туралы ақпарат табылмады.

Айнұр САПАРОВА

Бүгін, 10:23