​Жұмыстан шығарды ма, әлде өзі кетті ме: Атырауда балалар кардиохирургінің қызметінен кетуі қызу талқыланып жатыр

Атырауда Атырау облыстық балалар ауруханасының кардиохирургі Алексей Кимнің қызметінен кетуіне қатысты қызу пікірталас туындады, деп хабарлайды Newtimes.kz.

Бұған Threads желісіндегі жазба себеп болды. Жазба авторы дәрігерді жұмыстан шығарып жіберді деген ақпарат таратқан. Оның айтуынша, Ким мырза денсаулық сақтау жүйесінде 14 жыл жұмыс істеп, туа біткен жүрек ақауы бар балаларға көмектескен, соның ішінде ауыр дерттерді анықтап, кішкентай пациенттерді Астанаға ота жасатуға жіберіп отырған.

Бұл жарияланым желі қолданушыларының үлкен алаңдаушылығын тудырды. Пікір қалдырушылар дәрігерді мықты маман деп атап, ата-аналарды «e-Otinish» платформасы арқылы Денсаулық сақтау министрлігіне ұжымдық шағым түсіруге шақырды. Кейбіреулер дәрігердің жеке клиникада пациенттерді қабылдауды жалғастырып жатқанын да атап өткен.

Кейін Атырау облыстық Денсаулық сақтау басқармасы жұмыстан шығару туралы тараған ақпараттың шындыққа жанаспайтынын мәлімдеді.

Ведомствоның мәліметінше, Алексей Кимнің негізгі жұмыс орны — «ART Life» клиникасы. Сонымен қатар, ол 2019 жылдың 1 наурызынан бастап Атырау облыстық балалар ауруханасында қосымша жұмыс ретінде 0,5 ставкамен кардиохирург болып қызмет атқарған.

Басқарманың хабарлауынша, 2026 жылдың 21 маусымында дәрігер өз еркімен жұмыстан босату туралы өтініш берген. Қазір бұл өтініш еңбек заңнамасына сәйкес белгіленген тәртіппен қарастырылып жатыр.

Сондай-ақ, 2026 жылдың 18 маусымында Алексей Ким мемлекеттік награда — «Шапағат» медалімен марапатталған. Награданы оған басқа да денсаулық сақтау жүйесінің қызметкерлерімен бірге Қазақстан Президенті Қасым-Жомарт Тоқаев табыс етті.

Бүгін, 09:59