Жасыл ел жастар жасағы үздіктер қатарында

Алматы қаласы Жастар саясаты басқармасының қолдауымен өткен  «Жасыл ел» еңбек жасағы жұмыс маусымын қорытындыланды, деп хабарлайды Egemen.kz.

Биыл жобаға 2 мыңнан астам жас қатысқан. Олар үш ай бойы қаланы көгалдандыру, ағаш отырғызу, көше мен саябақты абаттандыру және тазарту жұмысымен айналысты. Маусым қорытындысы бойынша Алматының қалалық штабы республика бойынша ең үздіктер қатарынан табылды.

«Бұл жай ғана жазғы жұмыс емес, мыңдаған алматылық жастың еңбектің қадірін түсінуіне, Отанға қызмет ету рухын сезінуіне ықпал еткен маңызды бастама. Биыл біз Алматы қаласындағы жоғары оқу орындары мен колледждердің 2 100 студентін маусымдық жұмыспен қамтыдық. Жасыл белсенділер күн сайын таңғы мезгілден бастап еңбек етіп, қаламыздың дамуына үлес қосты. Бұған дәлел – Алматы қаласының «Жасыл ел» штабының республика бойынша үздік деп танылуы. Осындай өнімді еңбек жастарға жауапкершілік, тәртіп және командалық жұмыстың құндылықтарын дарытады», – деді Алматы қаласы Жастар саясаты басқармасының басшысы Азиз Қажденбек.

Ұйымдастырушылардың пікірінше, мұндай бастамалар табиғатты жақсартуға ғана емес, жас ұрпақтың экологиялық мәдениетін арттыруға ықпал етеді. Маусымның жабылуында үздік шыққан 20 жасқа естелік сыйлықтар табыс етілді.

АЛМАТЫ