Қазақ қыз жігіттері үздіктер қатарында

Дулат пен Илья нокаутпен жеңді. Алматы қаласында кәсіпқой бокс кеші ұйымадастырылып, ол жерде әуесқой бокстағы ұлттық құрама өкілдері жұдырықтасуға мүмкіндік алды. 

Әсіресе Дулат Бекбауов өзбекстандық қарсыласын ауыр соққысымен құлатып, жекпе-жекті уақытынан бұрын аяқтады. Артынша Илья Калили дәл осылай әзербайжандық қарсыласын ұтты. 

Бес каратэшіміз әлем үздіктері қатарында. Халықаралық каратэ федерациясы жылды қорытындылап, ең үздік спортшылардың тізімін жасады. Жаңартылған рейтингте бес бірдей ұлттық құрама өкілі алдыңғы ондыққа кірді. Әсіресе әйелдер арасында ең жеңіл салмақта Мөлдір Жаңбырбай топ бастап тұр. Айта кетейік, қызылордалық қыз осы спорт түрінен елге әлем чемпионатының алғашқы алтынын әкеліп, тарихи нәтиже тіркеген еді. Мөлдір биылдың өзінде бірнеше жарыста жеңімпаз атанды. Бұған қоса, 61 келіде өнер көрсететін Әсел Қанай әлемдік рейтингте екінші, ал +68 келідегі Софья Берульцева тағы да екінші тұр. Ерлер арасында 75 келіде қазақстандық Нұрқанат Әжіқанов үшінші орынға жайғасты. Ал 84 келіге дейінгілер арасында Әлихан Қадырғали оныншы орынға тұрақтады. Жалпы 2025 жыл отандық каратэшілер үшін жемісті болды деуге келеді. Дархан Асаділов баптайтын қыз-жігіттер Азия чемпионаты мен Әлем чемпионатынан және бірнеше кешенді ойындардан өте жақсы нәтижемен оралды.  

Махмұд Сабырхан үміткерлер қатарында 

Махмұд Сабырхан жыл үздігі атануы мүмкін. World Boxing ұйымы биылғы жарыс нәтижелерін саралап, ең үздік боксшылардың тізімін жариялады. Енді дауыс беру арқылы олардың арасында жеңімпазды анықтамақ. Сонымен жоғарыдағы тізімге ерлер арасында бес былғары қолғап шебері ілікті. Оның ішінде қазақстандық Махмұд Сабырхан бар. Бұған қоса, өзбекстандық Жавохир Умматалиев пен Фазлиддин Эркинбоев және бразилиялық Луис Оливейра мен Юри Фалькао да осы қатарда. Айта кетейік, Махмұд Ливерпульде өткен әлем чемпионатында алтын жеңіп алды. Жавохир мен Фазлиддин де өз салмақтарында топ жарды. Ал Луис пен Юри күміс жүлдегер атанған болатын. Әйелдер арасында да дәл осындай тізім жасалды. Оған ұлттық құрама сапындағы Наталья Богданова кірді. Ол да Ливерпульдегі әлем чемпионатында қарсылас шақ келтірмеп еді. Натальяның жыл үздігі атанудағы негізгі бәсекелестері үндістандық қос боксшы Жасмин Ломбария мен Минакши Хода, бұған қоса, норвегиялық Суннива Хофстад және польшалық Агата Качмарска болмақ. Жеңімпаздардың есімі жақын күндері жарияланады. 

Әмір Закиров – әлем чемпионы 

Әмір Закиров әлем чемпионы атанды. Қазақстандық брейк данс шебері Біріккен Араб Әмірліктерінің  Дубай қаласында өткен дүниежүзілік додада топ жарды. Айта кетейік, бұл бағыт қазір ресми спорттар қатарына қосылған. Тіпті халықаралық олимпиадалық комитет оны жазғы ойындар бағдарламасына да енгізді. Сәйкесіше, жыл өткен сайын бәсекелестік артып келеді. Қазақстандық Әмір Закиров финалда америкалық Мигель Анхель Росариомен шеберлік байқасып, төрешілер шешімімен жерлесіміз үздік атанды. Ал қола жүлде ресейлік Руслан Файзрахмановқа бұйырды. Айта кетейік, Әмір былтыр Францияның Париж қаласында өткен олимпиада ойындарына да қатысқан болатын. Ол ширек финалға дейін жетіп, жарыс қорытындысы бойынша сегізінші орынға тұрақтады.