Қазақ университеттері үздіктер қатарында

Бірнеше қазақстандық жоғары оқу орны Азияның үздік университеттері деп танылды. Оларды марапаттау рәсімі Сеул қаласында QS Азия-Тынық мұхит аймағының жоғары білім саммиті аясында өтті. Еліміздің жоғары оқу орындары қандай жетістіктері үшін марапатталды және Қазақстан мен Оңтүстік Корея университеттері қалай ынтымақтасады?

2004 жылдан бері британдық QS - Куакварелли Симмондс компаниясы жариялап келе жатқан әлемдік университеттер рейтингі - ең беделді тізімдердің бірі болып саналады. Бұл компания жоғары оқу орындарын бес балдық жүйе бойынша бағалайды. Сеулде өткен Азия-Тынық мұхит аймағының жоғары білім саммитінде Қазақ ұлттық медицина университеті, Нархоз және Алматы менеджмент университеті төрт жұлдызға ие болды. Ал бес жұлдызды университет атағы Абай атындағы Қазақ ұлттық педагогикалық университетіне берілді. QS жұлдыздары білім сапасы, түлектердің еңбек нарығындағы сұранысы, ғылыми зерттеулер және басқа да көрсеткіштер бойынша табысталады.

Болат Тілеп, Абай атындағы ҚазҰПУ ректоры:

- Бұл дегеніміз, біріншіден, біздің әлемдік жоғары білім кеңістігіне тездетіп енуіміз, екіншіден, осы кеңістіктегі үлкен бәсекеге қабілеттілікті арттыру мәселесі. Сондықтан елімізде осы жүлдеге ие болған қазіргі таңда екінші жоғарғы оқу орны болып табыламыз. Бұл әрине университетіміздің үлкен ұжымының қажырлы еңбегінің жемісі.

QS саммитінде Букетов атындағы Қарағанды университетінің өкілдері корей әріптестерімен ынтымақтастық жөнінде келіссөздер жүргізді. Келесі жылы бұл оқу орнында тағы бір шет тілін оқу мүмкіндігі пайда болады.

Ербол Сармурзин, Қарағанды Ұлттық зерттеу университетінің проректоры:

- Келесі жылы стратегиялық бағытымызда студенттерге кәріс тілін оқыту жоспарланған. Енгізу бойынша біз бірінші кезекте Қазақстандағы Корея елінің елшілігімен жұмыс істеп жатырмыз. Сондай-ақ Korea Foundation деген орталық бар. Бұл вариатив немесе қосымша пән ретінде емес, тереңдетілген кәріс тілінің маманы болып шығады және олардың дипломында педагогикалық бағыт болғаннан кейін алдағы уақытта олар кәріс тілінің мұғалімі дипломын алады.

Сондай-ақ Қарағанды университетінің ғалымдары Сеулде қазақстандық корей диаспорасының өміріне арналған монографияны таныстырды. Кітапта Оңтүстік Кореяда құрметтелетін, өткен ғасырдың 30-жылдары Карлагқа жер аударылған генерал Ким Гён Чон туралы құнды мәліметтер бар.

Әсел Мырзахметова, Е. Букетов атындағы қарағанды ұлттық зерттеу университетінің ассистент профессоры:

- Кеше профессор Пак Ханмен кездесу болды, ол біздің еңбегімізді жоғары бағалады. Біз мұрағат деректерін де, көптеген фотоматериалдарды да таптық. Бірнеше ондаған ауызша сұхбат жинақталып, транскрипцияланып, осы монографияға енгізілді. Еңбегіміз босқа кетпей, көпшілікке, ғалымдарға және Қазақстандағы корей диаспорасы өкілдеріне пайдалы болады деп үміттенеміз.

Сондай-ақ Қарағанды университеті мен Сончин әйелдер университеті арасында ынтымақтастық туралы меморандумға қол қойылды. Бұл құжат қарағандылық студенттердің Сеулде білім алуына, ал корей студенттерінің Қарағандыға келуіне мүмкіндік береді.

Авторлары: Владислав Цой, Ольга Лян