ЖИ ұстаздардың көмекшісіне айналды

Жасанды интеллект мұғалімдердің көмекшісіне айналды. Интерактивті 3D-модельдер география, биология сынды пәндерде күрделі тақырыптарды жеңіл түсіндіріп, оқушылардың ынтасын арттырады.

Бүгінде жасанды зият мұғалімдердің цифрлық көмекшісіне айналған. Тақырыпты пысықтау үшін тест пен ойын түріндегі тапсырмаларды да жылдам әрі оңай дайындайды. Мәселен, № 111 келешек мектебі бүгінде цифрлық жүйеге көшіп, оқу үдерісін жаңа деңгейге көтеріп отыр. Білім ошағында 3,5 мыңнан астам оқушы оқиды.

Сая Мейрамбаева, Астана қ. әкімдігінің «111 жалпы орта білім беретін мектеп» ШЖҚ МКК директордың оқу ісі жөніндегі орынбасары:

- Мысалы, Rocket AI деген платформаны алатын болсақ, биология сабағында жасушаның құрылымы, адам ағзасының құрылымы деген сияқты тақырыпты өткен кезде экранның жан-жағынан көрсете отырып оқушыға толық ақпарат береді. Оқушы көзбен көріп, оның есте сақтау қабілетін өте жоғары дамытады деп айтсақ болады. Google for Education платформасымен жұмыс жасаймыз. testter.kz деген қазақстандық платформа бар. Ол жерде тек қана жасанды интеллект емес, тестілеу, аралық білімді бағалау деген сияқты бөлімдерде әртүрлі платформаның мүмкіндіктерін пайдаланамыз.

Біз қазір STEM зертханада тұрмыз. Мұнда балалар өз жобаларын жасап шығарады. Мысалы, биылдан бастап олар ерекше жобаны қолға алған. Ол оқушылардың стресс деңгейін жасанды зерде негізінде анықтайтын платформа.  Бұдан бөлек, «Ақылды шлагбаум» жобасы да бар. Оның ерекшелігі көлік жақындағанда жүйе оны автоматты түрде танып, жүргізушінің бөгетсіз өтуіне мүмкіндік береді.

«Педагогтер жасанды интеллект көмегімен оқушылардың логикалық және сыни ойлау қабілеттерін дамытуға басымдық беріп отыр. Бұл дағдылар қалыптаспаса, баланың когнитивті дамуы баяулайды», - дейді мамандар.

Бекнұр Қойшыбай, информатика пәнінің мұғалімі:

- Бұрынғымен салыстырғанда қазір барлық информатика сабақтарында жасанды интеллект қолданылады. Визуализация болсын, ойын саласы болсын, геймификация болса да барлық кезеңде информатикада жасанды интеллект қолданылып жатыр. Себебі бұл қазіргі білім саласының талабы деп айтсақ болады. Әр сынып деңгейі бойынша бағдарламалау 6-10 сыныпқа деген сияқты, 3D модельдеу 6 сыныптан басталады деген сияқты. Бұл кезде де жасанды интеллект қолданылады.

Оқушылар да сабақ берудің мұндай ерекше әдістеріне тәнті. Жасанды зерденің пайдасы - берілген ақпаратты тез өңдеп, тапсырманы жеңілдетеді. Педагогтерге қойылатын басты талап  - академиялық адалдық пен киберқауіпсіздікті сақтау. 

Сая Мейрамбаева, мектеп директорының оқу ісі жөніндегі орынбасары:

- Жасанды интеллект мұғалімге көп көмегін тигізеді. Біріншіден, уақытты үнемдеу жағынан. ҚМЖ жасағанда, бөлім бойынша тоқсандық жиынтық бағалау жұмыстарын жасаған кезде жасанды интеллекті қолдану өте тиімді. Бірақ әрбір мұғалім жасанды интеллектімен алынған ақпаратты сол күйінде пайдаланбай, оның артығын алып тастап, өңдеп беру өте маңызды.

Ал виртуалды зертханалар арқылы оқушылар химиялық реакцияларды қауіпсіз ортада зерттей алады.

Дильнара Мұқан, химия пәнінің мұғалімі:

- Эксперименттердің аса қауіптісі болса немесе уақытты тиімдірек пайдалануда бұл үлкен көмегін береді. Мысалы, айта кетейік,  химияда электровит тақырыбы болса, оны «изи сенс» бағдарламасында датчиктер арқылы түсіндіре аламын. Rocket AI бағдарламасына кіремін де балаларға дайын эксперимент түрін көрсете аламын. Соның бәрі қазір химияның үлкен тиімді мәселесі болуда.

Сабақ берудің заманауи тәсілдері бүгінде өз жемісін беріп келеді. Оқушылардың жетістіктері де аз емес. Мәселен, жас өнертапқыштар STEM бағыты бойынша дрон ұшыру жобасымен Дубайда өткен халықаралық сайыста жеңімпаз атанып, Түркияға жолдама жеңіп алған.

Авторлары: Дильназ Тұрғазыева, Досбол Байдильдин