Еліміз логистикалық хабқа айналды

Елдің көлік-логистикалық әлеуеті дамып келеді. Қазақстан 40-тан аса елге автокөлікпен жүк тасымалын жүзеге асырады. 

Былтыр 352 млн тоннадан аса тауар жеткізілген. Көрсеткіштің айтарлықтай өсіп жатқаны байқалады. Бұған не себеп? 

Еліміз логистикалық хабқа айналып үлгерді. Қазір инфрақұрылымды жетілдіруге басымдық беріліп жатыр. Мамандар «маңызды сауда бағыттарының тоғысында тұруымыз – жауапкершілік әрі жаһандағы әлеуетіміздің артуына сеп» дейді. Расында, Қазақстан – Қытай, Еуропа, Ресей және Каспий аймағындағы елдерді, яғни Шығыс пен Батысты және Солтүстік пен Оңтүстікті байланыстыратын көпір. ҚТЖ express-тің жаңа жобалар және маркетинг бойынша басқарушы директоры

Әсем Мұхамедиева еліміздің жай ғана транзиттік аумақ емес, нағыз логистикалық хабқа айналғанын айтады. Оның сөзінше, Қытайдан Еуропаға жүк жеткізу мерзімі 20-25 күнде, теңіз арқылы тасымал 40-60 күнде жүзеге асады. Жеткізу мерзімінің қысқаруына Қазақстанның ұйымдастырушы және қызмет көрсетуші ретіндегі ролі де ықпал еткен.

Әсем Мұхамедиева, Ktz Express-тің жаңа жобалар және маркетинг бойынша басқарушы директоры:

- Бізде күшті магистралдық база бар. Транзиттік ағынмен жұмыс істей аламыз. Енді тетіктерді дамыту керек. Шекара өткелдері, терминалдар, порт инфрақұрылымдары және қызмет көрсету, оған цифрландыру үдерісін де қоса аламыз. Жалпы біздің логистикалық жүйеміз жүк ағынының артуына дайын.

Елде жүк тасымалы артты 

Бір жылда елдегі жүк тасымалы сегіз пайыз артты. Қазақстан арқылы 1 млрд тонна жүк тасымалданған. Кәсіпорындарға түскен кіріс 5,7 трлн теңгеден асады. Ұлттық статистика бюросының дерегіне сүйенсек, тасымалдың жартысына жуығын теміржол көлігі қамтыды. Былтыр шойын жол арқылы

466 млн тоннадан аса жүк тасымалданған. Кіріс көлемі екі трлн теңгеден асты. Құбыр арқылы жүк тасымалы 340 млн тоннаға жуықтады. Өсім 15 пайыз шамасында. Ал түскен түсім 1,9 трлн теңге. Әуе тасымалы да кенже қалған жоқ. Көрсеткіш 8 пайызға артып, бас-аяғы 30 мың тонна жүк ұшақпен жеткізілді. Түскен түсім 19 млрд теңге. Күре жолдар арқылы 352 млн тонна жүк жеткізілді. Бұл шамамен 1 жарым трлн теңге.

Нұрлан Сауранбаев, ҚР көлік министрі:

- Жүктерді автокөлікпен тасымалдау 42 елмен жүзеге асырылады. Былтыр Қытай және Өзбекстанмен шетелдік рұқсат бланкілері қағаз түрінен электрондық форматқа ауыстырылды.

Көлік ағынын есептеу жетілдірілді

Биыл авто жолдардағы көлік ағынын есептеу автоматтандырылады. Тас жолдардағы қозғалыс қарқыны жыл сайын бес пайызға дейін өсіп келеді. Әйтсе де көлік ағыны тұрақты түрде есептелмейді. Сол себепті Қазжол ғылыми-зерттеу институтының мамандары ұлттық есептеу моделін түзді. Бұл үшін арнайы датчиктер мен ақылды камералар пайданылады. Автопарктың дамуы мен логистикалық бағыттардың экономикалық белсенділігі де назарға алынады. Ғалымдар: «Жаңа ереженің жолдарды жобалауда кететін қателіктерді барынша қысқартады», - дейді. Демек бюджетті үнемдеп, жолдағы қауіпсіздікті арттыруға мүмкіндік артуы тиіс. 

Пилотсыз жүк көліктері пайда болады

Келесі жылы елде пилотсыз жүк көліктері де қатынайды. Пилоттық жоба жайлы министр мәлімдеді. Батареямен жүретін жүк көліктері өзге елдерден де келеді. Сол себепті жолдар салғанда, инфрақұрылымды барынша жоспарлау маңызды. Нұрлан Сауранбаев жоба бойынша заңдық нормалар дайындалып жатқанын айтты. Кейін ЕАЭО аясында да талқыланады. Жалпы пилотсыз жүк көліктері елдің транзиттік әлеуетінің артуына ықпал етеді дейді министр.