Жылап, қосылып шырқады : Астанадағы такси жолаушысының эмоцияға толы видеосы желіде тарап кетті

Астаналық таксидің жұмбақ жолаушысы Нұржан Керменбаевтың әніне ерекше ықыласпен қосылып шырқап, Қазнетті таңғалдырды. Видео 300 мыңға жуық қаралым жинады. Tengri Life тілшісі жүргізушіден көлікте не болғанын және оған бейнебақылау не үшін қажет екенін білді.

"Дауысын қаттырақ шығаршы" - видео

Астана таксилерінің бірінде жолаушы Нұржан Керменбаевтың "Жаным, арманым" әнін қосуды өтінген. Ол музыканың дауысын қаттырақ шығаруды сұрап, қайырмасында әнге эмоциямен қосылып, тіпті жылап жіберген. Содан кейін жолаушы межелі жерге жетпестен, кенет көліктен түсіп қалған. Бұл сапардың видеосы желіде тарап кетті.

Ролик 300 мыңға жуық қаралым жинады. Желі қолданушылары пікірлерде әзілдеп, таныстарын белгілеп, "енді бұлай істемеуін" әзілдеп өтінген. Кейбіреулер жағдайға байсалды қарап, жолаушының күйіне алаңдаушылық білдіріп, жанашырлық танытты. Бұл ретте қолданушылардың бір бөлігі оқиғаның шынайылығына күмән келтіріп, видео алдын ала жоспарланған болуы мүмкін екенін болжады.

Біз видеодағы такси жүргізушісі Оразбекке хабарластық. Ол такси саласында 8 жылдан аса уақыт жұмыс істейді. Айтуынша, сол күні ол сүйіктісін сағынып жүрген танысын жеткізіп салған.

"Артқы орындықта танысым отырған еді. Ол үйіне апарып тастауды өтінді. Сапар кезінде осы жағдай болды. Қызын сағынып, оны есіне алып, жылап жіберген сияқты", - деді ол.

Оразбектің айтуынша, бұрын Атырауда бейнетіркегішсіз жұмыс істеген кезде, шектен шығатын жолаушылармен жиі жағымсыз жағдайлар болып тұрған.

"Ең алдымен, бұл өз қауіпсіздігім үшін керек. Жолаушылар бейнетіркегішті көргенде, көп жағдайда өздерін әлдеқайда мәдениетті ұстайтынын байқадым. Бұрын Атырауда камерасыз жұмыс істегенімде, әдепсіз мінез көрсететін мас жолаушылар жиі кездесетін. Қазір мұндай жағдайлар азайды", - деп бөлісті ол.

Сондай-ақ ол мас жолаушылардан бөлек, жүргізушілердің басқа да қиындықтарға тап болатынын атап өтті. Мысалы, кейбір клиенттер көлік шақыру нүктесін жабық шлагбаумның арғы жағына қояды, жолақысын төлемеуге тырысады немесе дөрекілік танытады.

Осылайша, бейнетіркегіш жүргізуші үшін ерекше оқиғаларды тіркеу құралы ғана емес, қосымша қауіпсіздік шарасына айналды. Оның айтуынша, камераның болуы даулы жағдайларды азайтуға көмектеседі және жолаушыларды тәртіпке салады.

Айта кетсек, көлік ішіндегі камералар әйел жүргізушілерді де құтқарып жүр. Жақында Астанада сот көлікте жанжал шығарған жолаушыға 10 тәулік әкімшілік қамауға алу туралы шешім шығарды: ер адам рөлдегі әйелді қорлап, қорқытқан.

Google News арқылы жаңалықтарымызды қадағалаңыз