2025 жылы 21 инвестициялық жоба жүзеге асты

2025 жылы Жамбыл облысында жалпы құны 27 жарым млрд теңге болатын 21 инвестициялық жоба жүзеге асты. Нәтижесінде 500-ден астам жұмыс орны ашылды. 

Жалпы өңірде алдағы үш жылда құны 4,1 трлн теңге болатын 62 жоба жоспарда бар. Бірнеше кәсіпорынның құрылысы басталып та кетті. 

Жүзеге асып жатқан инвестициялық жобалардың қатарында жылына 3 млн тонна қалдықсыз болат өңдейтін металлургия зауыты бар. Одан бөлек, 3 млн тонна жүгеріні терең өңдейтін зауыт құрылысы жүріп жатыр. Қос жобаның құны 1 трлн теңгеге жуықтайды. Ал Сарысу ауданында ірі инвестор 1 млн тоннаға дейін минералды тыңайтқыш шығаратын химиялық зауыт салып жатыр. Мұнда жылына 800 мың тонна күкірт қышқылы мен 4 түрлі химиялық өнім шығады. Сондай-ақ осы ауданда елдегі алғашқы кальцийленген сода өндіретін зауыт салынуда. Кәсіпорын басында 500 мың тонна өнім шығарып, кейін қуаттылығын екі есе арттырады. Өндіріс 2026 жылдың төртінші тоқсанында пайдалануға беріледі.

Юсуф Джейлан, кәсіпорын директоры:

- Кәсіпорын іске қосылғанда 400 жаңа жұмыс орны ашылады. Біз Қазақстан нарығын өніммен толық қаматамасыз етіп, қалғанын экспортқа шығаруды жоспарлап отырмыз. Мұнда ең алдымен жергілікті тұрғындарды жұмыспен қамтимыз. Осында жатыр жұмыс істеу үшін шағын қалашық та салып жатырмыз.

Қазір өңірде 4,1 трлн теңгені құрайтын 62 жоба іске асып жатыр. Жергілікті билік барлығымен келісімшарқа отырып, кейбір кәсіпорынның құрылысы басталып кеткен. Нәтижесінде 2029 жылға дейін 8 мың 300 жұмыс орны құрылмақ.

Ернар Оразбай, облыстық кәсіпкерлік және индустриалды-инновациялық дамыту басқармасы басшысының орынбасары:

- Көбінесе өңдеу өнеркәсібіндегі жобалар, ауыл шаруашылығына қатысты жобалар, сонымен қатар жасыл энергетика көздері. Үлкен жобалар болғандықтан ол жерде міндетті түрде салықтардың түсуі күтіледі. Сонымен қатар ең басты мәселе Жамбыл облысы бойынша жұмыссыздық деңгейін төмендетеді. Ашылып отырған 8 мыңның жұмыс орынының барлығына дерлік жергілікті тұрғындарды қамтитын болады.

Жергілікті билік аймаққа ақша салуға келген инвесторларға барынша жағдай жасап жатыр. Арнайы экономикалық және индустриялық аймақ дайындап, тегін жер беріп, инфрақұрылым мәселесі шешіп тапты. Оған қоса инвестор кеден мен БАЖ салығынан босатылады. «Мұндай қолайлы жағдай инвестордың қаржы салуға деген қызғушылығын арттырады», - дейді экономист Мақсат Халық. 

Мақсат Халық, экономист:

- Бұны енді долларға ауыстыратын болсақ, бұл – 12 млрд көлеміндегі қаражат шығып тұр. Ол үлкен қаражат шындығын айтқан кезде, бір өңір үшін тартылып отырған. Енді салыстыру үшін айта кетейін, 2007-2009 жылы қаржылық дағдарыс болған кезде тұтастай мемлекетті құтқару үшін ұлттық қордан аударылған қаражат көлемі 10 млрд доллар еді. Ал бұл өңір бір өзіне осындай инвестиция тартып отыр. Салынатын нақты өндіріс ошақтары жүзеге асатын болса, және ол толық циклды қамтамасыз ететін болса, онда осы өңірдің экономикалық дамуына сөзсіз оң әсерін тигізеді.

2025 жылы өңірге ел және шетел инвесторлары 553 млрд теңге құйған. Соның нәтижесінде Жамбыл облысы инвестиция тарту бойынша республикада үздік үш облыстың қатарына кірді. 

Авторлары: Мерей Бает Елдар Байділдә