2026 жылғы егіс науқанын ерте қаржыландыру басталды

Үкімет отырысы барысында Премьер-министр Олжас Бектенов ауыл шаруашылығы саласындағы дайындық жұмыстары мен алдағы маусымға арналған міндеттерді талқылады. Үкімет басшысы 2026 жылғы көктемгі егіс және егін жинау науқанының ерте қаржыландыруы басталғанын атап өтіп, ауыл шаруашылығы тауарын өндірушілердің барынша қамтылуын қамтамасыз етуді тапсырды, деп хабарлайды Egemen.kz.

Фото: Үкіметтің баспасөз қызметі

Премьер-министр Олжас Бектенов салалық министрліктер мен өңірлердің әкімдіктеріне бірқатар тапсырма берді.

Ауыл шаруашылығы министрлігіне өңір әкімдіктерімен бірлесіп, форвардтық келісімшарттар шеңберінде Азық-түлік корпорациясына бидайды уақтылы жеткізу міндеттемелерін орындауды қамтамасыз ету тапсырылды. Бұл қор еліміздің ішкі сұранысын өтеуге бағытталады.

«Келесі егін егу науқанына дайындықты қазірден бастау керек. Облыс әкімдіктері 2026 жылы кемінде 2,3 млн тонна минералды тыңайтқыш себуді қамтамасыз етулері қажет. Өнеркәсіп министрлігі егіншілерге қажетті тыңайтқыш көлемін отандық өнім өндірушілермен алдын ала пысықтап алғаны жөн. Әкімдіктер тыңайтқыштарды жеткізу үшін уақтылы шартқа отырып, қоймаларда олардың жеткілікті қорын қамтамасыз етсін», деді Үкімет басшысы.

Айта кетейік, Ауыл шаруашылығы министрлігі мен «Бәйтерек» холдингі 2026 жылғы көктемгі егіс пен егін жинау жұмыстарын ерте қаржыландыруды бастап кетті. Бұл шара ауыл шаруашылығы өндірушілерінің уақытылы дайындалуына және өндірістік процестердің үздіксіз жүруіне мүмкіндік береді.

Жалпы үйлестіру жұмысы Премьер-министрдің орынбасары – Ұлттық экономика министрі Серік Жұманғаринге жүктелді.