49 тонна алтын: Ұлттық банк әлемдік рейтингте екінші орында тұр

2025 жылдың қаңтар-қараша айлары аралығында Қазақстан алтын сатып алу көлемі бойынша әлемде екінші орынға көтерілді.
Бұл туралы Дүниежүзілік алтын кеңесінің (World Gold Council) деректерінде айтылған.

Аталған кезеңде Қазақстан Ұлттық банкі 49 тонна алтын сатып алған. Бұл көрсеткіш бойынша ел тек Польшаға жол берді. Польша орталық банкі 11 айда алтын қорын 80 тоннаға арттырған.

Жалпы алғанда, бұл деректер әлемнің орталық банктері арасында алтынға деген қызығушылықтың әлі де жоғары екенін көрсетеді. Алайда 2025 жылдың қараша айында алтын сатып алу көлемі қазан айымен салыстырғанда төмендеген. Қарашада әлемдік орталық банктер барлығы 45 тонна алтын сатып алған.

Осы айда Қазақстан Ұлттық банкі 8 тонна алтын сатып алып, ең ірі сатып алушылардың алғашқы бестігіне кірді және төртінші орыннан көрінді. Көшбасшылар қатарында Польша (12 тонна) мен Бразилия (11 тонна) бар. Сонымен бірге Өзбекстан 10 тонна, Қырғызстан мен Чехия 2 тоннадан, ал Қытай мен Индонезия 1 тоннадан алтын сатып алған.

Жалпы, 2025 жылдың 11 айында әлемнің орталық банктері 297 тонна алтын сатып алған. Бұл алтынның стратегиялық резерв ретіндегі маңызы сақталып отырғанын көрсетеді.