9 тонналық кесек және 10 жылдық іздеу: Алматыда атышулы ұрлыққа қатысушы табылды

Алматыда көп тонналық титан құймасын жымқыру ісі бойынша 10 жыл бойы халықаралық іздеуде болған 63 жастағы ер адам ұсталды, деп хабарлайды Tengrinews.kz Polisia.kz сайтына сілтеме жасап.

Ұрлық 2015 жылы болған

Полицияның мәліметінше, 2015 жылы Өскемендегі кәсіпорындардың бірінің қызметкерлер тобы қымбат шикізатты жымқыру схемасын жасаған. Салмағы 9370 келі болатын титан құймасы ұрлық нысанына айналған, оның құны 31 миллион теңгеден асқан.

Қаскөйлер қызметтік жағдайын пайдаланып және күзет қызметкерлерімен келісе отырып, жүкті бақылау-өткізу пункті арқылы кәсіпорын аумағынан алып шыққан. Ұрланған затты жасыру үшін көп тонналық құйманы көліктің шанағына салып, матамен жауып, үстіне технологиялық және тұрмыстық қоқыс тастаған.

Тергеу барысында полицейлер схеманың барлық қатысушыларын анықтады. Ұрланған мүлік табылып, тәркіленді. 2016 жылдың мамыр айында Өскемен соты бес сотталушыны аса ірі мөлшерде ұрлық жасағаны үшін кінәлі деп танып, оларды мүлкін тәркілеумен бірге бес жылға жалпы режимдегі колонияда жазасын өтеуге үкім кесті.

Алайда қатысушылардың бірі жасырынып үлгерген. Оған халықаралық іздеу жарияланды.

Кейінгі жылдары криминалдық полиция қызметкерлері іздеудегі адамның болуы мүмкін жерлерін, байланыстарын және келіп түскен жедел ақпараттарды тексере отырып, оның жүрген жерін анықтауды жалғастырған.

"Он жылдан кейін ер адам Алматы қаласында анықталды. Қазіргі уақытта 63 жастағы күдікті уақытша ұстау изоляторына қамалды. Одан арғы процестік шешімдер заңда белгіленген тәртіппен қабылданады", - делінген хабарламада.

Полиция іздеудің ескіру мерзімі тергеу мен соттан бой тасалап жүрген адамдарды анықтауға кедергі болмайтынын атап өтті.

Google News арқылы жаңалықтарымызды қадағалаңыз