Абай облысында шалғайдағы ауыл ажарланып келеді

Биыл Абай облысындағы Аягөз ауданында бірқатар ілкімді іс атқарылды. Әлеуметтік маңызы бар нысандар ашылып, халықтың тұрмысы жақсарды. Облыс басшысы шалғайдағы Малтүгел ауылының тынысымен танысып, алдағы уақытта жүзеге асатын жобалар туралы айтты.   

Малтүгел — шалғайдағы ауыл. Жалғыз медициналық пункті ұзақ жыл бойы ескі ғимаратта орналасты. 100-ден астам тұрғыны бар елді мекенде заманауи нысан қолданысқа берілді. Медициналық мекеме 30–40 шақырым жердегі Ортаарал және Ақшоқы ауылының тұрғындарына, қыстақтағы қожалықтарға қызмет көрсетеді.

Мұсағажы Сақажанов, Малтүгел ауылының тұрғыны:

- Ауырып сырқасаң, осында қараласың. Дәрігер де, медбике де бар.

Ақылбек Мұрсәлімов, Малтүгел ауылының тұрғыны:

- Бұрын енді медпункт болған жоқ. Мектептің жанында бөлме болды. Енді ауыл тұрғындарына келеді. Ауылда үлкендеріміз келеді, әке-шешеміз бар дегендей.

Биыл Аягөздегі жылу желілерін жөндеуге 2 млрд теңге бағытталды. Жаңадан үш қазандық орнатылды. Ұзындығы шамамен 4 шақырым болатын жылу желісі ауыстырылды. 

Берік Уәли, облыс әкімі:

- Мемлекет басшысының халықты 100 пайыз ауыз сумен қамтамасыз ету тапсырмасы бар. Биыл облыста 33 жобаны іске асыруға 16,7 млрд теңге қаржы қарастырылды. Оның ішінде осы Аягөзге қатыстыларын айтатын болсақ: Байқошқар, Қорық, Ай ауылдарының 2 мың тұрғыны жыл соңына дейін ауызсумен толық қамтамасыз етілетін болады. 

Ләззат Молдашева, Аягөз қаласының тұрғыны:

- Халық осы ауданға қажетті өздерінің ойларында жүрген пікірлерімен бөлісуде. Мұндай кездесулер халықпен жиі болып тұруы қажет. Айтылған сұрақтар орындалып ауданымыздың экономикасы, қай саласында да ілгерілеушілік болады деген сенімдемін. 

Аудан бойынша жыл соңына дейін 80 отбасы қоныс тойын тойлайды. Облыс әкімі жол, ауызсу, жарықтандыру сияқты мәселелер шешіліп, нақты жоспар мен Үкімет тарапынан тиісті қолдау болатынын айтты.

Авторлары: Рүстем Қайратұлы, Мәди Базарбеков