Абай облысында Жас сарбаз қозғалысына жеті мыңнан астам адам мүше

Абай облысында әскери-патриоттық клубтар қатарына мүше болуға ынталы жастар артып келеді.

Бүгінде «Жас сарбаз» қозғалысына 7 мыңнан астам жасөспірім мүше. Ұйым келешек ұрпақ бойына отансүйгіштік қасиетті дарытуда орасан жұмыс атқарып жүр. Қазір белсенді жастар Тәуелсіздік күні қарсаңында түрлі жарыстар мен патриоттық сайыстарға дайындық үстінде.

Шәкәрім атындағы гимназияның оқушылары кезекті патриоттық жарысқа дайындық үстінде. Әскери-патриоттық клуб мүшелері қазақтың қаһарман қыздары Әлия мен Мәншүктің бейнесін сахналайды. 11-сынып оқушысы Әлия Бектеміроваға Әлия Молдағұлованың ролін сомдау бұйырған.

Әлия Бектемірова, оқушы:

- Осы батыр апаларымызды дәріптеу бұл маған өте қатты күш қуат берді. Яғни осылай Әлия апамыздың рөлін сомдау бұл менің жүрегімдегі рухты оятты.

Серік Түсіповтің педагогика саласында жүргеніне 30 жылдан асты. Қазір патриоттық клубқа мүше болуға асығатын жастар саны артып келеді, дейді  алғашқы әскери дайындық пәнінің мұғалімі. Сонымен қатар мектептерде «Жас сарбаз», «Жас сақшы», «Жас құтқарушы» және «Жас бүркіт» секілді арнайы сыныптар жұмыс істейді.

Серік Түсіпов, «Жас сарбаз» қозғалысының төрағасы:

- Клубтың берері мол екенін балалар бүгінгі таңда түсініп келе жатыр. Жылдан жылға осы клубқа тәрбиеленушілердің саны артуда. Өйткені балалардың қызығушылығы бар. Тәуелсіздік күніне де белсенді шараларға атсалысамыз. Мемлекет болған соң оның қарулы күштері болады, соны қорғайтын азаматтарды біз тәрбиелеп жатырмыз. 

Әскери-патриоттық клубтар тек мектептер де емес, колледждерде де бар. Қазір 28 клубта 800 бала тәрбие алады. 

Болат Құрманов, «Дарын орталығы» әскери-патриоттық бағытты дамыту бөлімінің басшысы:

- Олардың міндеті мақсаты мемлекетіміздің болашақ беріктігі мен елдіктің тұтастығын сақтаудың кепілі. Болашақ Отан қорғаушылар, әскери паториоттық тәрбиені алған, жауапты өзінің елін сүйетін, жерін сүйетін ұрпақты тәрбиелеу болып есептеледі. 

Абай облысында әскери-патриоттық тәрбиенің ауқымы жыл сайын кеңейіп келеді. Облыс бойынша 234 әскери-патриоттық клуб 5 мыңнан астам оқушыны біріктіреді. 

Рүстем Қайратұлы, Мәди Базарбеков