Әділдік орнасын деп едім : Атырауда жанармай құю бекетінің кассирі полиция шақырғаны үшін жазаланғанын даулауда

Қыздың айтуынша, жанармай құю станциясындағы түнгі жанжал мың теңгеден басталған. Бір клиент алдын ала төлеген бензин патрульдік көліктің багына құйылып кеткен.

Азаттық көшесіндегі жанармай құю станциясының кассирі Иоланта Капустина оқиғаның 6 тамыз таңертең болғанын айтты. Клиент мың теңгеге бензин төлеген, бірақ жанармай құйылмаған — себебі жүргізуші моторды өшірмегендіктен қызметкер отын құюдан бас тартқан. Машина кетіп қалған, ал төленген бензин иесін күтіп қалған.

Бірақ оны басқалар алған.

Бірнеше минуттан кейін сол колонкаға жол-патрульдік полиция көлігі келеді.

Кассир алдын ала төлемді жою үшін қызметкерге жанармай тапаншасын кері колонкаға қою керектігін айтқан, бірақ ол тапаншаны патрульдік көліктің багына салған.

— Жүйе алдыңғы төлемді жоймағандықтан, полиция көлігіне басқа клиенттердің ақшасына төленген бензин құйылды. Полицейлер тағы мың теңге төлеп, көлікке екі мың теңгенің жанармайы құйылды, — дейді Капустина.

Қыздың айтуынша, бүкіл жағдай жанармай құю станциясының бейнебақылау камераларына түсіп қалған. Сондықтан оқиғаның ретін анықтау қиын емес.

Тез шешіледі деп ойлаған Капустина 102 нөміріне қоңырау шалған.

Алайда оқиға басқаша өрбиді. Кімнің ақшасына жанармай құйылғанын анықтамай, керісінше кассирдің өзіне сұрақтар қойылды.

Капустинаға Әкімшілік құқық бұзушылық кодексінің 438-бабы 1-бөлігі  («Арнайы қызметтерді әдейі жалған шақыру») бойынша хаттама толтырылды. Құжатта 05:47-де ол 102 нөміріне полиция қызметкерлерінің азаматтардың ақшасына жанармай құйып жатқанын хабарлағаны жазылған, ал бұл хабарлама жалған деп танылған.

Оған 259 500 теңге айыппұл салынды, ал қысқартылған тәртіппен төлеу сомасы — 129 750 теңге.

Бұл шешіммен келіспеген Капустина прокуратура мен полиция департаментіне бірнеше шағым жолдады. Ол өзін әкімшілік жауапкершілікке тартудың заңдылығын, полиция қызметкерінің әрекетін тексеруді, сондай-ақ жанармай құю станциясының бейнекамераларының жазбасын, бейнежетондарды, патрульдік көліктің тіркеуішін және 102 нөміріне қоңырау жазбасын талап етті.

Бұл оқиғаға «Ақ Жайық» басылымы да араласты. Редакция полиция департаментіне және прокуратураға ресми сұрау жолдап, жағдайға түсініктеме беруді, қызметтік тексеріс жүргізіліп жатқан-жатпағанын және шағымдағы деректерге баға беруді сұрады. Мемлекеттік органдардың жауабы алынған соң міндетті түрде жариялаймыз.

Анастасия ШЕРСТЯНКИНА

Бүгін, 14:46