Агросектордағы өнімділік 15 пайызға өсті

Алматы облысында егін жинау науқаны аяқталды. Тоғыз айдың қорытындысы бойынша ауыл шаруашылығы өнімдерінің көлемі 530 млрд теңгеден асты.

Өсім негізінен егін және жылыжай шаруашылығында тіркелді. Су тапшылығына қарамастан диқандар өнімділікті шамамен 15 пайызға арттыра алды.

Алматы облысында егін жинау науқаны аяқталуға жақын. Алқаптардан астық, жүгері және көкөніс түгел жиналды. Өнімділік былтырмен салыстырғанда 15 пайызға өскен. Шеңгелді аймағында шаруалар 8,5 мың гектарға егін еккен. Негізгі дақылдардың бірі - пияз. Биыл оның көлемі 500 гектардан асып, жалпы өнім шамамен 18,5 мың тонна болады деп болжанып отыр.

Ардақ Айтханов, шаруа қожалығының иесі:

- Былтыр еккенде пияз жердің бетіне шыққанда құрт жеп қойып, пиязымызды тастаған күндер болды. Биыл енді шүкір. 20 тоннаның көлеміндк 1 гектардан сондай алып отырмыз.

Өндірілген пияз ішкі нарықтан бөлек шетелге де жөнелтіледі. Отандық өнімге сұраныс артып, фермерлер егіс алқаптарын кеңейтуде. Негізгі көлемі Алматы мен көршілес аудандардың базарларына жеткізіледі. Бұл импортқа тәуелділікті азайтып, өңірдің азық-түлік қауіпсіздігін нығайтуға мүмкіндік береді.

Ғалым Тоқпейісов, Ауыл шаруашылығы басқармасының басшысы:

- Жалпы біздің өндірген бақша өнімі, көкөніс өнімдері – бұның бәрі Алматы облысының өзінде өндірілгені өзіне жетеді деп айтуға болады. Сонымен қатар Алматы қаласына, көрші облыстарға да шығып кетеді. Осы өңірлерді қамтамасыз етіп отыр. Жалпы біздің өңірде қазіргі уақыттың өзінде 48 жылыжайлар бар. Бұл жылыжайларда өсірілген помидор-қиярлардың деншілігі көрші мемлекеттерге кетеді экспортқа.

Сарапшылардың айтуынша, ауыл шаруашылығы өнімі көлемінің артуына мемлекеттік қолдау бағдарламаларының ықпалы тиген. Биыл «Ауыл аманаты» жобасы аясында 2,5 миллиард теңгеге 271 жоба қаржыландырылды. Келер жылы тағы екі жүзден астамы жүзеге асырылады. Оның қатарында мал шаруашылығы мен жылыжай бағыттары бар.

Асқар Ыбырайымов, Қонаев қаласы Ауыл шаруашылығы бөлімінің басшысы:

- Шаруаларға көбінесе суғармалы судың субсидиясы төленді. Жыл басынан бері төленіп жатыр. Қарапайым түрмен суғаратын шаруа қожалықтарына бекітілген тарифтен 55% субсидия ретінде төлеп беріп отыр. Одан бөлек егерде шаруа қожалықтары су үнемдеу технологиясын қолданған жағдайда бекітілген тарифтен 80% үкімет субсидия ретінде су берушілерге төлеп беріп отыр.

Бұдан бөлек мемлекет тұқым, жанармай және су ресурстарына кеткен шығынның бір бөлігін өтеп отыр. Көптеген шаруашылық тамшылатып және жаңбырлатып суару жүйелерін енгізіп жатыр. Мұндай әдістердің арқасында бір гектардан 80 тоннаға дейін өнім алуға мүмкіндік бар. Қазір Алматы облысы елдегі жалпы ауыл шаруашылығы өнімінің 10 пайыздан астамын өндіреді.

Авторлары: Гүлім Советхан, Аят Дүйсембай, Аманжол Жөнкешов