Қостанай облысының табысы 50 пайызға өсті

Мемлекет басшысының Жолдауын жүзеге асыру мәселелері талқыланған сараптамалық жиында танымал саяси және экономикалық сарапшылар Қостанай облысының жаңа даму стратегияларын пікірталас форматында қарастырды. 

Аймақтың экономика драйверіне терең талдау жасалды. Бұрын аграрлық аймақ саналатын өңір қазір машина жасау, логистика, азық-түлік және қайта өңдеу өнеркәсібінің орталығына айналды. Соның нәтижесінде соңғы үш жылда облыс бюджеті шамамен 55,4%-ға артты. Жергілікті кәсіпорындарда 3500-ден астам жаңа жұмыс орны ашылды.

Елдің жетекші экономистері мен саясаттанушылары Қостанайда пікірталас жүргізіп жатыр. Ашық диалог форматында өңірдің экономикалық және әлеуметтік серпіні талқылануда. Соңғы үш жылда аграрлық аймақтың экономикасы түбегейлі өзгерді. Машина жасау және энергетика салаларына 388 млрд теңгеден астам инвестиция тартылды. Президент өз Жолдауында өңірлердің экономикалық және әлеуметтік дербестігін арттыру міндетін қойды.

Жаңа бюджет кодексінде пайдалы қазбаларды өндіруден түсетін салықты республикалық деңгейден жергілікті бюджеттерге беру қарастырылған. Бұл — 400-ден астам кен орны бар Қостанай облысы үшін маңызды қадам.

Талғат Қалиев, саясаттанушы:

- Бюджеттік кіріс жағынан 50 пайызға өсіп кетті. Ол керемет көрсеткіш. Өйткені бұл жағдайда қазір бүкіл облыстар қиналып жүргенде Қостанай облысы өсіп келе жатыр. Ол бір ерекшелік. Соның бәрін қарау керек, зерттеу керек.

Индустриясы қарқынды дамыған облыста бүгінде 924 кәсіпорын жұмыс істейді. Жүк көліктеріне арналған автокомпоненттер, газоблоктар, теміржолға арналған серіппелер шығаратын жаңа зауыттар іске қосылды. Индустрия көлемі артқан сайын энергияға сұраныс та өсуде. Қазір аймақ экономикасына 1 млрд текше метрден астам газ қажет.

Рахым Ошақбаев «Талап» қолданбалы зерттеулер орталығының директоры:

- Өнеркәсіптік сұраныстың жоғары деңгейге жеткені соншалық, Ақтөбе облысынан газ жеткізу жобасы жақын уақытта іске асады деп үміттенеміз. Бұл Қостанайдың газ тұтынуын бес есеге арттыруы мүмкін.

Әлеуметтік салада да өңір көш бастап тұр. Соңғы үш жылда облыста 1,5 млн шаршы метр тұрғын үй салынды және 33 денсаулық сақтау нысаны ашылды.

Авторлары: Данияр Сұлтанұлы, Ермек Мұхамедияров