Албания премьері Брюссельдің әрекетін сынға алды

АСТАНА, 3 қазан – Sputnik. Албания премьер-министрі Эди Рама Украинаның Еуропалық одаққа мүшелікке өту мүмкіндігіне қатысты Брюссельдің ұстанымын сынға алды.

"Украинаға қараңыздар. Оған беріліп жатқан уәделер – өтірік. Егер Украина барлық талапты орындап, Еуроодаққа қабылданудың қалыпты тәртібімен жүретін болса, оны ешқашан қабылдамайды. Мұны бәрі біледі", — деді Рама немістің Welt am Sonntag басылымына берген сұхбатында.

Албания премьерінің айтуынша, Украина үшін тиімді жол – Киевті келіссөзге шақырып, тиісті процесс аяқталғаннан кейін Еуроодаққа толыққанды мүше ету.

Бұған дейін Euractiv Украина Еуроодаққа кіру үшін қажетті реформаларды бірқатар мүше мемлекет күткеннен баяу жүргізіп жатқанын хабарлаған.

Владимир Зеленский бұған дейін Еуроодақтан Украинаны 2027 жылы ұйым құрамына қабылдауды сұраған болатын. Алайда Еуропа көшбасшылары бірнеше рет Украина заңнамасының еуропалық стандарттарға толық сәйкес келмейтінін айтып, елдің ЕО-ға мүшелігін қарастырудың негізгі шарттарының бірі – ауқымды реформалар жүргізу екенін мәлімдеген.