Алдымен мансап, үйлену содан кейін: қазақстандықтар алғаш рет қанша жаста некеге тұрады?

Қазақстандықтар алғашқы некеге кешірек тұратын болды. Сонымен қатар ел өңірлерінде бұл жас көрсеткіші әртүрлі. Бұл туралы Ұлттық статистика бюросының деректеріне сілтеме жасап Tengrinews.kz тілшісі хабарлайды.

2023 жылы Қазақстанда ер адамдар алғаш рет орта есеппен 27,9 жаста, ал әйелдер 25,3 жаста некеге тұрған. 2014 жылы алғашқы некенің орташа жасы тиісінше 27,1 және 24,6 жасты құраған еді.

Қалалық ер адамдар алғаш рет орта есеппен 28,1 жаста, ал ауылда тұратын ер адамдар 27,5 жаста үйленеді. Әйелдер арасында бұл көрсеткіш тиісінше 25,8 және 24,3 жасқа тең.

Алғашқы некеге ең ерте тұратындар - Түркістан облысының тұрғындары: орта есеппен 22,7 жас. Шымкентте бұл көрсеткіш 23,7 жасты, Жамбыл облысында - 23,8 жасты, Қызылорда облысында - 24 жасты құрайды.

Сурет жасанды интеллект көмегімен жасалған

Алғаш рет тұрмысқа ең кеш шығатындар - Шығыс Қазақстан облысының әйелдері (орта есеппен 27,5 жаста). Қостанай облысында - 26,8 жаста, Павлодар, Солтүстік Қазақстан облыстарында, Астана мен Алматыда - шамамен 26,6–26,7 жаста.

Сурет жасанды интеллект көмегімен жасалған

Осылайша, жекелеген өңірлер арасындағы айырмашылық 4,8 жасқа жетеді.

ер адамдар арасында да алғашқы некенің ең кеш жасы Шығыс Қазақстан облысында тіркелген - 30 жас. Ал Маңғыстау облысының тұрғындары орта есеппен 26,2 жаста алғаш рет шаңырақ көтереді. Айырмашылық - 3,8 жас.

Қазақстандық қоғамдық даму институтының материалдарында 18–29 жас аралығындағы жастардың көбіне "алдымен мансап, содан кейін отбасы" деген ұстанымды қолдайтыны айтылған. Бұл ретте материалдық тұрақтылық отбасын құру үшін қажетті шарт ретінде жиі қарастырылады. Әлеуметтік зерттеу нәтижелеріне сәйкес, сауалнамаға қатысқандардың 45,8 пайызы қаржы мәселесін отбасылық жанжалдардың ең көп таралған себебі ретінде атаған.

"Сұхбатқа қатысушылардың барлығы дерлік отбасын құру кезінде қаржылық қамтамасыз етілудің басты маңыздылығын атап өтеді. Бұл ертеңгі күнге деген сенімділіктің кепілі және психологиялық жайлылықтың шарты ретінде қабылданады", - делінген институт жауабында.

2025 жылы Қазақстанда 115 мыңға жуық неке тіркелді - бұл бір жыл бұрынғыдан 8,6 мыңға, ал 2022 жылғыдан 13,3 мыңға аз.

Психологтар неке қию санының азаюын адамдардың серік таңдауға мұқият қарай бастауымен және жеке жайлылықты бірінші орынға жиі қоюымен байланыстырады. Отбасын құрмас бұрын көбі білім алып, мансап жолын қалыптастырып, баспанаға ақша жинағысы келеді. Мамандар басқа факторлар қатарында жылжымайтын мүліктің қымбаттығы мен күнделікті шығындарды да атайды.

Сонымен қатар неке көптеген қазақстандық үшін маңызды болып қала береді: зерттеу деректері бойынша, сауалнамаға қатысқандардың 42 пайызы ресми тіркеусіз өмір сүруді дұрыс емес деп санайды. Респонденттер некеге тұрудың басты себебі ретінде махаббатты атаған, бірақ қаржылық факторлардың да маңызы бар.

Бізді Google-дың негізгі дереккөздер тізіміне қосыңыз