Александр Бублик Мастерс турнирін жартылай финалда аяқтап, маусымның қорытынды жарысына жолдама ала алмады

Қазақстандық теннисші Александр Бублик Парижде өткен беделді ATP Masters турнирінің жартылай финалында әлемнің 10-ракеткасы Феликс Оже-Альяссимнен  6:7, 4:6 есебімен ұтылып қалды, – деп хабарлайды Aikyn.kz

Осы нәтижеден кейін Бублик Туринде өтетін маусымның қорытынды турниріне (ATP Finals) тікелей жолдама алу мүмкіндігінен айырылды. 

Бұған дейін турнирге қатысуды жеті ойыншы қамтамасыз еткен: Янник Синнер, Новак Джокович, Карлос Алькарас, Александр Зверев, Алекс Де Минор, Тэйлор Фритц және Бен Шелтон.

Бублик үшін бұл турнир ерекше — ол алғаш рет мансабында «Мастерс» жарысының жартылай финалына дейін жетті және келесі аптада әлемдік рейтингте 13-орынға көтеріледі, бұл оның карьерасындағы ең жоғары көрсеткіш болмақ.

Соған қарамастан, ол ATP Finals турниріне резерв ойыншы ретінде қатысу мүмкіндігіне ие.

Келесі аптада Бублик Метц қаласында өтетін ATP 250 турнирінде бағын сынайды.