Әлемде күміс қымбат әрі қат

Әлемдік нарықта күміс қымбаттап келеді. Өйткені сұраныс жоғары. Ақ металға қазір технология мен энергетика саласы да зәру. 

Күміс әсіресе цифрлық экономикада бағалы әрі тапшы затқа айналды. Тіпті өндірісте іркіліс бар. Күміс институтының The Silver Institute болжамына сүйенсек, нарықта сұраныс биыл шамамен 95 млн унцияға артық болуы мүмкін. 

Кейінгі төрт апта ішінде күміс 27,43 пайызға қымбаттап, 66,88 АҚШ долларына саудаланып жатыр. Көрсеткіш жыл басынан бері 120,36%-ға артқан. 

Баға қымбат. Өйткені сұраныс жоғары. Ал өндіру жағы ақсап тұр. Оған себеп: әлемдік күміс өндірісінің жартысынан астамы тиесілі Латын Америкасында кеніштер ескірген. Қорлар сарқылған. Әлемдік өндірістің 25%-ын қамтамасыз ететін Мексика кейінгі екі жылда айтарлықтай дағдарысқа тап болды. Сондай-ақ күміс өндіруші елдердің ондығына кіретін Перу, Боливия және Чили кеніштерінде де күміс едәуір түгесілген. Әрі бұл елдердегі саяси ахуал да шатқаяқтап тұр. Лондондық GlobalData компаниясы сарапшыларының болжамы бойынша, жаңа кен орындары ашылмаса, алдағы онжылдықта Латын Америкасындағы күміс өндірісі тоқырауға ұшырауы мүмкін. 

Әлемде технология саласы күміске зәру

Әмбебап қасиетінің арқасында, күміске әр тараптан сұраныс жоғары. Әсіресе жасанды интеллект. Энергияны жұтып, суды сіміріп жатқан деректер орталығы күміске қарап тұр. 2000 жылы жаһандық IT инфрақұрылым қуаты 0,93 ГВт болса, биыл бұл көрсеткіш 50 ГВт-қа жеткен. Яғни 53 есе өсті. Күміс институтының болжамына сенсек, алдағы бес жылда әлемдік өнеркәсіпте күміске сұраныс тұрақты түрде артады.

Күміс  –  әлемдегі ең үздік электрөткізгіш. Компьютерде, ұялы телефоныңызда, сонымен қатар жасанды интеллект саласында деректерді өңдеу орталықтарындағы кез келген жоғары жылдамдық үшін көп күміс қажет.

Майкл Штайнманн, Pan American Silver бас директоры:

- Мәселен, жасанды интеллект саласындағы алпауыт АҚШ-тың өнеркәсіп секторы күміс импортына тәуелді. Былтыр бұл металдың 65%-ы сырттан келіп, 44%-ын Мексика, 17 %-ын Канада, 5%-ын Оңтүстік Корея және Польша қамтамасыз етті.

Күміс АҚШ-та ең тапшы деген сирек металдардың тізімінде. Oxford Economics сарапшылары автокөлік секторындағы сұраныс 2031 жылға дейін жыл сайын орта есеппен 3,4%-ға артады деп болжап отыр. Сонымен қатар деректерді өңдеу орталықтарының құрылысы 65%-ға өсуі мүмкін. Биыл президент Дональд Трамп Мексика мен Канададан келетін болат пен алюминийге 25 пайыздық кедендік баж салығын енгізді. Алайда оның ішінде күміс жоқ. Бұл елдер ірі жеткізушілер болғандықтань баж салығына қатысты қауіп күміс бағасына әсер етті.

Күміске сұраныс артты 

Күміске сұраныс баламалы энергия мен электромобиль саласында да жоғары. Ал көлікке сұраныс жыл сайын орта есеппен 3,4%-ға өсіп отыр. Тоқпен жүретін бір көлік іштен жану қозғалтқышы бар модельдерге қарағанда 67–79%-ға күмісті артық тұтынады. Әрі Еуроодақ алдағы бес жылда күн энергетикасының қуатын кемінде 700 ГВт-қа жеткізбек. Демек күміс стратегиялық маңызды өнеркәсіптік металл болып қала береді.