Әлеуметтік жауапкершілік Самұрық Қазына холдингінің негізгі бағыты болып қалады

Былтыр «Самұрық-Қазына» компаниялар тобының әлеуметтік жобалары аясында бір миллионнан астам қазақстандыққа қолдау көрсетілді.

Корпоративтік-әлеуметтік жауапкершілік дәл осы холдинг қызметінің негізгі бағыты болып қала береді. Соның ішінде инклюзия, медицина және бұқаралық спорт салаларына басымдық беріліп жатыр.

Балаларға арналған оңалту орталықтары, инклюзив сыныптары, әр аймақтағы спорт залдары және шалғай елді мекендерге жолданған дәрігерлер. Мұның бәрі "Самұрық-Қазына" компаниясының Samruk-Kazyna Trust қоры арқылы жүзеге асырған әлеуметтік жобалары. 

Былтырдың өзінде 12,5 млрд теңгеге 39 әлеуметтік жоба қаржыландырылды. Қазір өңірлерде 55 оңалту орталығы жұмыс істеп тұр. Онда жыл сайын 21 мыңдай балаға көмек көрсетіледі.

Ақбаян Нақыпова, Түркістан облысының тұрғыны:

- ЛФК-сын алып жатырмыз. Одан кейін механотерапиясын. Баланы аппараттарға салады. Азғантай болса да ем жақсы әсер етіп жатыр. 

Ирада Төлегенова, "Қамқорлық" оңалту орталығының невролог дәрігері:

- Бір жылда бір-ақ рет емін алып жүрген қаншама бала келді. Қазір солардың ішінде 3 рет, 4 рет келген ата-аналар бар. И оларда нәтижелер өте жоғары деңгейде. 

"Самұрық-Қазына" АҚ басқарма төрағасы Нұрлан Жақыповтың айтуынша, әлеуметтік жобалар - елдің болашағына салынған инвестиция. Оңалту орталықтарынан бөлек Ақмола, Атырау облыстары мен Астана қаласында 17 инклюзивтік қолдау кабинеті ашылды. Соның нәтижесінде ерекше қажеттілігі бар 2 мың бала білім алып жатыр.  

Алтынай Кенжалиева, Астана қаласының тұрғыны:

- Балаларымыз үшін мектепте қолайлы жағдай жасалуы өте маңызды. Бұл бастамалар балаларымыздың дамуына және қоғамға тез бейімделуіне оң ықпал етеді.

Облыс орталықтарынан шалғайда орналасқан елді мекен тұрғындары үшін "Саламатты Қазақстан" медициналық-құқықтық пойызы жолға шықты. Ондағы мамандар бір жыл ішінде 123 ауылда аялдап, 100 мыңнан астам адамға қызмет көрсетті. Сонымен қатар кейінгі бес жылда аймақтарда 18 спорт кешені қолданысқа берілді. Онда 740 мыңнан астам тұрғын шыныға алады.

Еркебұлан Смадияров