Премьер Энергетика министрлігі мен Самұрық Қазына қорының басшылығына жеке жауапкершілік туралы ескертті

Премьер-министр Олжас Бектенов Энергетика министрлігі мен "Самұрық-Қазына" қорының басшылығына бірқатар ірі энергетикалық нысандардың уақтылы пайдалануға берілуіне қатысты жеке жауапкершілік бар екенін еске салды. Бұл туралы ол үкімет отырысында мәлімдеді, деп хабарлайды Tengrinews.kz.

Әңгіме Алматы жылу-электр орталықтары (ЖЭО), сондай-ақ Түркістан облысындағы бу-газ қондырғысы туралы болып отыр.

"Энергетика министрлігі мен "Самұрық-Қазына" қоры басшыларының назарына Алматыдағы ЖЭО-2 және ЖЭО-3 станцияларын, сондай-ақ Түркістан облысындағы бу-газ қондырғысын уақтылы пайдалануға беру үшін жеке жауапкершілік жүктелетінін ескертемін", - деді Олжас Бектенов.

Үкімет басшысы өткен аптада Энергетика министрі ЖЭО-2 және ЖЭО-3 нысандары бойынша ревизия жүргізгенін айтты.

"ЖЭО-3 бойынша жұмыс қарқыны төмен. Егер жыл соңына дейін шара қолданбасаңыздар, сіздердің жеке жауапкершіліктеріңіз қаралатын болады. Мәселені қатаң бақылауда ұстаңыз", - деп тапсырды премьер.

Олжас Бектенов ел экономикасының дамуы, индустрияландыру және цифрландыру процестері энергетикалық қуаттарды одан ары арттыруды және инфрақұрылымның өсіп келе жатқан қажеттіліктерін сенімді түрде қамтамасыз етуді талап ететінін атап өтті.

Еске сала кетейік, маусымда Олжас Бектенов "Қазақстан темір жолы" (ҚТЖ) ұлттық компаниясының басшысы Талғат Алдыбергеновке де осындай ескерту жасаған болатын. Ол кезде премьер жеке жауапкершілік туралы ескертіп, ұлттық компания басшысына транзиттік тасымал жоспарынан қалып қою мәселесін көтерген еді.

Өткен аптада Талғат Алдыбергеновтің ҚТЖ басқарма төрағасы қызметінен кеткені белгілі болды. Ұлттық компания басшысының міндетін атқарушы болып Бауыржан Орынбасаров тағайындалды.