Алматы ауруханаларында дәрігер чат бот іске қосылмақ

Цифрландыру мен жасанды интеллекті Алматы қаласының ауруханаларына да келіп жетті. Алматылық дәрігерлер тұрғындарды кезекте тұрғызбаудың цифрлық шешімдерін ұсына бастады. Атап айтқанда, ЖИ-мен тіркеу, дәрігерге жазу, онлайн кеңес беру, онлайн медициналық көмек көрсету, скрининг пен тексеріске шақыру, хабарландыру беру сынды мүмкіндіктерді қолға алды. Енді қала емханаларында чат-бот пен өз-өзіне қызмет көрсету терминалдарын іске қосуды жоспарлап отыр. 

Алматы қаласында еліміздің ешбір аймағында жоқ Цифрлы медицина орталығы жұмыс істейді. Мұнда шамамен 100-ге жуық маман көмек көрсетеді. Олар қала тұрғындарына қашықтан қызмет көрсетіп, дәрігерлік кеңес береді; науқастарды, жүкті әйелдерді, созылмалы ауруға шалдыққандарды бақылауда ұстайды. Әрі жасанды интеллектіні пайдалана отырып, қаланың денсаулық картасын жасап, оның көрсеткіштері мен нәтижелерін жинастырып отырады. Сол арқылы қала халқының денсаулығын қадағалайды. Мұны телемедициналық патронаж дейді. 

Орталық заманауи медициналық технологиялармен жабдықталған. Денсаулық сақтау көрсеткіштерін күндіз-түні мониторинг жасап отырады. 

Орталықтың бірыңғай байланыс нөмірі де іске қосылған – 1312. Бірінші желіде оператор дәрігерлер отырса, екіншісінде кеңес беруші дәрігерлердің өзі отырады. Ауруханаға барып кезекте тұрмас үшін алдын ала осы нөмірге хабарласып, аурудың мән-жайын үйде отырып біліп алуға болады. Мәселен, баланың тісі, іші ауырса, дәрет сындыра алмаса, тамақ іше алмаса, тағы басқа жағдайлар орын алса, орталыққа хабарласып кеңес алуға мүмкіндік бар. Операторлар онлайн сұхбаттаса отырып, науқастың хал-жағдайын біледі, ахуалын бағалайды, егер қажет болса, дәрігерге келіп жолығуын айтып, қабылдауға жаздырады.  

«Сондай-ақ, орталықтың іске қосқан тағы бір жаңалығы – хабарландыру айтатын ЖИ-көмекші. Ол тексеріске келуге, скринингтен өтуге, екпе алуға, флюорографияға түсуге тиіс пациенттерге өзі қоңырау шалып, құлақтандырады. Қажет болса, маманмен байланыстырып береді. Алда мұндай роботтың мүмкіндігін әлі де жетілдіру жоспарланып отыр. Мұның бәрі емханалардың жүктемесін азайтып, тұрғындардың уақытын үнемдеуге, кейбір медициналық мәселерді онлайн шешуге бағытталған», - дейді  Almaty Digital Medical Center жобасының мамандары. 

Жоба мамандары мұнымен тоқтап қалмай, енді медициналық кеңес беретін чат-ботты әзірлеп шығуды жоспарлап отыр. Сондай-ақ, телепатронаждың басқа да бағыттарын іске қосуды, қаладағы емханалардың барлығын ортақ контакт-орталыққа біріктіруді, сөйтіп цифрлық медициналық хаб құруды да көздеп отыр.