Каспий жағалауында қазақстандық әскерилердің қаза болуы: оқу жаттығу туралы не белгілі

Каспий теңізіндегі қайғылы оқиғадан екі күн бұрын Қазақстанның Қорғаныс министрлігі "Хазар қорғаны-2026" әскери-теңіз оқу-жаттығуы басталғанын хабарлаған. Ведомство іс-шараның ауқымы, мақсаты мен қатысушылар құрамы туралы айтқан болатын, деп хабарлайды Tengrinews.kz.

500-ден астам әскери қызметші және жауынгерлік кемелер

Қорғаныс министрлігінің мәліметінше, оқу-жаттығу бірыңғай стратегиялық командалық-штабтық оқу-жаттығу жоспары аясында Каспий теңізінің қазақстандық секторында өтіп жатыр. Оған Қазақстан Қарулы күштері Әскери-теңіз күштерінің бас қолбасшысы, 1-дәрежелі капитан Қанат Ниязбеков жетекшілік етеді.

Оқу-жаттығуға Әскери-теңіз күштері мен бекітілген бөлімшелердің 500-ден астам әскери қызметшісі, жауынгерлік кемелердің экипаждары мен жағалау бөлімшелері қатысып жатыр.

Сондай-ақ маневрлерге ҰҚК Шекара қызметінің Маңғыстау облысы бойынша Жағалау күзетінің және Қазақстан Қарулы күштері Әуе қорғанысы күштерінің күштері мен құралдары тартылды.

"Оқу-жаттығудың негізгі мақсаты – жеке құрамның кәсіби даярлығын жетілдіру, экипаждардың жауынгерлік әзірлік деңгейін арттыру және белгіленген міндеттерді орындау барысында күштер мен құралдардың өзара іс-қимылын пысықтау", - делінген хабарламада.

Еске сала кетейік, 24 қыркүйекте әскери оқу-жаттығу кезінде Каспий теңізіне 19 әскери қызметшіні ағыс алып кеткен. Қазіргі уақытта тоғыз адам қаза тапқаны тіркелді. Үш адам құтқарылды, оның біреуі ауруханаға жатқызылды. Қалғандарын іздестіру жұмыстары жүріп жатыр. Оқиға орнына шұғыл түрде құтқару қызметтерінің күштері мен құралдары жіберілді.

Ақтау гарнизонында әскери қызметшілердің қаза болу фактісі бойынша қылмыстық іс қозғалып, тергеу жүргізіліп жатыр.

Әскери қызметшілердің қаза болу себептерін тергеу үшін үкіметтік комиссия құрылды. Оның төрағасы болып премьер-министрдің орынбасары Қанат Бозымбаев тағайындалды.

Бізді Google-дың негізгі дереккөздер тізіміне қосыңыз