Каспий жағалауында өрт сөндіру құтқару бөлімі ашылды
24.KZ парақшасынан алынған деректерге сүйене отырып, Qazaq24.com жаңалық жариялайды..
Каспий теңізінің жағалауында өрт сөндіру-құтқару бөлімі ашылды, деп хабарлайды 24KZ. Заманауи құралдармен жабдықталған бөлімде қызметкерлерге де жан-жақты жағдай жасалған. Мамандар мұндағы воркаут алаңда спортпен айналысып, бос уақытта білімін жетілдіре алады.
Биыл салынған көп бейінді кешенде құтқарушылар мен өрт сөндірушілер бірге орналасқан. Енді оларға оқиға орнына жедел жетуге мүмкіндік бар. Құрылым Ақтаудың төменгі 10 ықшамауданы мен Өмірзақ ауылына, 4 өнеркәсіптік аймаққа қызмет көрсетеді және жазда 40 мыңдай адам бір мезгілде демалатын төменгі жағалаудағы қауіпсіздікті де қамтамасыз етеді. Жағалаудағы жаңа ғимарат қазіргі стандарттарға сай салыныпты. Мұнда қызметкерлердің бос уақытында дене дайындықтарын шыңдап, өздерін дамытуына жағдай жасалған.
Жәнібек Бекжанов, №13 мамандандырылған өрт сөндіру бөлімінің бастығы:
- Бұрын жағдай болған жоқ. Өрттен, адам құтқару жұмыстарынан шыққан кезде қызметкерлер ішке келген кезде жуынатын орын болған жоқ, дұрыстап отырып тамақ ішетін орын болған жоқ, оқу сыныбы да болған жоқ, тар болды. Қазір қысқа уақытта, небәрі 2,5 ай ішінде барлық жағдай жасалған, өте ыңғайлы. Заманауи әдемі өрт сөндіру бөлімі ашылды.
Өрт сөндіру бөлімінің теңіз жағында терраса, спорт алаңдары орналасқан. «Бұл құтқарушылардың ауыр шақыртулардан кейін өздерін қалпына келтіруі үшін аса маңызды», – дейді мамандар. Жаңа ғимаратта төтеншеліктердің сенімді серігі қызметтік иттерге де орын табылыпты.
«Найза» ныспылы бельгиялық төбет мұндағы мамандардың мақтанышы. Ол 4 жыл бойы аттестациядан мүдірмей өтіп, құтқарушыларға қалтқысыз қызмет етіп келеді.
Қанат Уәлихан, құтқарушы-кинолог:
- Бұларды біз күшік кезінен таңдаймыз. Күшіктер арасынан таңдайтын жолдары бар. Сол бір 5-6 күшіктің арасынан психикасы тұрақты, белсенділерін таңдап аламыз. Сосын біздің жұмыста «разрушение» дейміз ғой, қирағанда адамдар көп жиналады, «гражданский» адамдар болады. Қатты шу болған кезде иттермен жұмыс істеу қиын болады.
Бүгінде бөлімде 45 өрт сөндіруші мен құтқарушы еңбек етеді. Суға шомылу маусымы кезінде олардың саны да ұлғаяды. Маңғыстау облысында теңіз жағалауының жалпы ұзындығы 1400 шақырым. Төтеншеліктер күні-түні акваториядан көз жазбай, демалушылардың қауіпсіздігін бақылайды, катамаран мен гидроциклдердің қозғалысын қадағалайды. Олар жуырда түрлі мақсатта қолданылатын катерге қол жеткізіпті. Жүрдек су көлігіне навигациялық жүйе, теңіз тереңдігін өлшеу қондырғысы, белгі беру құралдары орнатылған.
Назар Ізтілеуов, Маңғыстау облыстық ТЖД жедел-құтқару жасағының бастығы:
- Жуыну кабинасы бар, тоңазытқыш бар. Жаз кезінде өте қолайлы. Осы жерде асхананы да ұйымдастыруға болады. Құтқарушылар жаңа катермен бір тәулік бойы жағалауға оралмастан жүзіп, теңіз бетін қадағалап, құтқару жұмыстарын жүргізеді.
Әзірге мұндай өрт-сөндіру құтқару бөлімі өңірде біреу ғана. Заманауи талаптарға сай келетін келесі ғимаратты алдағы жылы Ақшұқыр ауылында тұрғызу жоспарланған.
Авторлары: Е. Жылқайдарұлы, Тамара Степанова, Ренат Дусалиев
Бұл тақырыптағы басқа жаңалықтар:
Көрілімдер:23
Бұл хабарлама дереккөзден мұрағатталған 25 Қараша 2025 15:53 



Кіру
Жаңалықтар
Ауа райы
Магниттік дауылдар
Намаз уақыты
Қымбат металдар
Валюта конвертері
Кредит есептегіш
Криптовалюта бағамы
Жұлдыздар
Сұрақ - Жауап
Интернет жылдамдығын тексеріңіз
Қазақстан радиосы
Қазақстан телевизиясы
Біз туралы








Ең көп оқылғандар



















