Алматы мен Астана тұрғындары қатты ыстықты қалай өткерді статистика

Ұзаққа созылған ыстық аясында дәрігерлер күн өтуге байланысты шағым артқанын айтады. Алматыда мұндай жағдайлар саны екі есеге жуық өссе, Астанада ыстық күндері жедел жәрдем шақыртулары 15 пайызға көбейген, деп хабарлайды Tengri Health.

Алматыдағы жағдай қандай?

Алматы қалалық жедел медициналық жәрдем станциясының мәліметінше, ыстық пен күн өту, дене қызуының көтерілуі және ағзаның сусыздануы сияқты аптап салдарына қатысты шағымдану саны былтырмен салыстырғанда 13-тен 25 жағдайға дейін артқан.

Сонымен қатар осы себептерге байланысты ауруханаға жатқызылғандар саны да өсті. Былтыр жазда стационарларға төрт пациент жеткізілсе, биыл бұл көрсеткіш алты адамға жетті. Қалған зардап шеккендерге оқиға орнында көмек көрсетілді.

Мамандардың айтуынша, аптапта дәрігерлер созылмалы аурулары бар пациенттерге де жиі барады.

"Бұл жоғары температураның созылмалы ауруларды қоздырып, пациенттердің жалпы жағдайын нашарлатуы мүмкін екендігімен байланысты", - деп атап өтті ұйым өкілдері.

Көбіне жүрек-қан тамырлары аурулары, гипертония, тыныс алу мүшелерінің аурулары, инфаркт, инсульт және бүйрек шаншуы жиі кездеседі.

Жедел медициналық жәрдем қызметінің мәліметі бойынша, биыл жазда дәрігерлер мынадай жағдайларды тіркеген:

қан айналымы жүйесінің аурулары - 11 163 жағдай; гипертониялық ауру - 6 602; тыныс алу мүшелерінің аурулары - 10 603; инфаркт - 393; ми қайнайналымының жедел бұзылуы (инсульт) - 466; стенокардия - 817 және тағы басқалар.

Бұл ретте аптапқа қарамастан, Алматыда 2025 жылы да, 2026 жылы да ыстық немесе күн өту салдарынан болатын өлім жағдайлары тіркелмеген.

Астанадағы жағдай қандай?

Астана қалалық жедел медициналық жәрдем станциясының баспасөз қызметі қоғамдық денсаулық сақтау басқармасының мәліметіне сүйене отырып, 2026 жылдың маусымы және шілдесінде ыстық пен күн өтудің 39 жағдайы тіркелгенін хабарлады.

Бұл ретте аптап кезінде жедел медициналық көмекке жүгінгендер саны былтырғы сәйкес кезеңмен салыстырғанда 15,1 пайызға өскен.

Астана қалалық жедел медициналық жәрдем станциясы директорының медициналық жұмыс жөніндегі бірінші орынбасары Бота Сәдетхан бұған дейін басқа айларда бригада тәулігіне 1800–1850 шақыртуға қызмет көрсетсе, шілдедегі аптап кезінде шақырту саны 2000-нан асқанын айтқан болатын.

Оның сөзінше, ең ыстық күндері көбіне созылмалы дертке шалдыққандар зардап шегеді. Сарапшы Астанада шағымдар бойынша бірінші орында жүрек-қан тамырлары жүйесінің аурулары тұрғанын жеткізді - шақыртулардың 30 пайызына дейіні осы дертке тиесілі, бұл ең үлкен топ.

Сондай-ақ Астананың жедел жәрдем қызметі жоғары температура әсерінен болатын өлім жағдайлары тіркелмегенін атап өтті.

Бұған дейін синоптиктер жақын күндері Қазақстанда ыстықтың кезекті толқыны болжанатынын хабарлаған болатын. Иран аумағынан келетін жылы ауа массалары елдің батыс және оңтүстік өңірлеріне аптап әкеледі.

Астана мен Алматыда 7–9 тамызда ауа райы қандай болатынын мына жерден оқыңыз.

Google News арқылы жаңалықтарымызды қадағалаңыз

Жазылу

Қазақстан

Астана

Алматы

жедел жәрдем