Алматы облысында 53 энергетик мемлекеттік наградаға ұсынылды

22 желтоқсанда елде энергетиктер күні аталып өтеді.

Жалпылай алғанда саланың ел экономикасын өркендетудегі маңызы орасан зор. Кәсіби мереке қарсаңында Алматы облысында 53 маман мемлекеттік наградаға ұсынылды. «Бұл өмірін энергетика саласымен байланыстырған адамдарды құрметтеумен қатар атқарған жұмысымызды жоғары бағалаудың белгісі», дейді мамандар.

Алматы облысы бойынша энергетика саласында 15 мыңнан астам маман еңбек етеді. Жылыту маусымы кезінде қазандықтар мен жылу жүйесіне түсетін жүктеме еселеп артады. Жылу орталықтарының үздіксіз жұмысын қамтамасыз ететін қатардағы қарапайым слесарьлар мен инженерлер екені белгілі. Солардың бірі Серік Ербаев. Ол «Қонаев жылу орталығында» 20 жылдан бері жұмыс істейді. Еңбек жолын слесарь болып бастаған маман сәуір айында кәсіпорынның бас энергетигі қызметіне тағайындалды.

Серік Ербаев, "Қонаев жылу орталығы" мекемесінің бас энергетигі:

- Енді менің атқаратын басты қызметім жылу орталығын электр энергетикасы мен автоматикасын жетік бақылауда ұстап, апатсыз жағдайда ұстап тұру болып табылады. Қарамағымда 15 электромонтер және автоматика электромонтерлары бар. Қазіргі таңда жас мамандарды да мен жұмысқа тартып жатырмын. Оқу бітіріп келген жігіттерді жұмысқа алып, екі жас маман қазір қол астымда істейді. 

Энергия тапшылығын қатты сезініп отырған өңір үшін қуаткерлердің еңбегін елеп-ескеріп, сәйкесінше жоғары бағалау аса маңызды. Себебі тұтыну көлемі жыл өткен сайын арта түспесе, азаяр емес. Сол себепті облыста бірқатар ауқымды жоба жүзеге аса бастады.

Ержан Әділет, Энергетика және жылумен жабдықтау басқармасының бөлім басшысы:

- Қазақстанның оңтүстік өңірінде энергия тапшылығы бар екені барлығына мәлім. Сол себепті біз қазір осы деңгейді төмендету үшін әртүрлі жұмыстарды жүргізудеміз. Жаңа атап өткендей, осы Алматы облысында орналасқан жылу электр орталығы қазіргі таңда электр қуаттылығы 173 МВт болса, қазір жасалып жатқан жұмыс оның қуаттылығын 460 МВт-қа дейін көтеруге бағытталған. 2026 жылдың соңына дейін осы жобаны аяқтап, жалпы 300 МВт қосымша қуат енгізсек деген ойда бар. Өңірімізге келетін болсақ, бізде қазір энергия тұтыну көлемі 750-780 МВт-ты құрайды. 

Алматы облысында Қапшағай ГЭС-і мен күн электр стансалары жұмыс істеп тұр. Баламалы қуат көзін өндіру мақсатында ауқымды жобалар қолға алынып, инфрақұрылымды жаңғырту жұмыстары жүріп жатыр. Атом электр станциясының құрылысы басталуына байланысты жоғары оқу орындарына атом энергетикасы бойынша жаңа білім бағдарламалары енгізілді. Ол өз кезегінде білікті маман даярлап, энергетикалық қауіпсіздікті қамтамасыз етуге оң ықпал етеді. 

Ардақ Айбарұлы, Аят Дүйсенбаев, Аманжол Жөңкешов