Алматы облысында сыбайлас жемқорлық фактілері 75 пайызға азайды

Алматы облысында сыбайлас жемқорлық құқық бұзушылықтарының саны өткен жылдың сәйкес кезеңімен салыстырғанда төрт есеге төмендеді.
Нақтырақ айтқанда, биылғы алғашқы жартыжылдықта тіркелген жемқорлық фактілері 28-ден 7-ге дейін қысқарған.

Бұл мәлімет сыбайлас жемқорлыққа қарсы іс-қимыл мәселелері жөніндегі ведомствоаралық комиссияның кезектен тыс отырысында жарияланды.

Жиында «Заң мен тәртіп» қағидатын және «Әділетті Қазақстан» тұжырымдамасын іске асыру, қоғамда сыбайлас жемқорлыққа қарсы мәдениетті қалыптастыру, тұрғындардың құқықтық сауаттылығын арттыру мәселелері талқыланды. Отырысқа комиссия мүшелері мен жергілікті атқарушы орган өкілдері қатысты.

Комиссия отырысын ашқан облыс әкімі Марат Сұлтанғазиев өңірде сыбайлас жемқорлыққа қарсы саясатты жүзеге асыру, адалдық пен ашықтық қағидаттарын нығайту және алдын алу жұмыстарының тиімділігін арттыру мәселелеріне тоқталды.

– Заң мен тәртіпті қамтамасыз ету – мемлекеттік органдар қызметінің негізгі басымдықтарының бірі. Сондықтан жемқорлықтың алдын алу және қоғамның құқықтық мәдениетін арттыру бағытындағы жұмыстар жүйелі түрде жалғасуы тиіс, – деді облыс әкімі.

Жыл басынан бері өңірде сыбайлас жемқорлықтың алдын алу мақсатында 73 кездесу өткізіліп, оған 6 мыңға жуық адам қатысқан. Мониторинг барысында білім беру мен денсаулық сақтау салаларында тауар бағасын негізсіз көтеру және қажеттіліктен артық сатып алу фактілері анықталған.

Мемлекеттік қызмет істері агенттігінің Алматы облысы бойынша департаментінің араласуынан кейін бұл мәселелер қайта қаралып, бюджет қаражатының негізсіз жұмсалуына жол берілмеген. Нәтижесінде миллиондаған теңге көлеміндегі қаржы үнемделді.

Өңірде сыбайлас жемқорлыққа қарсы мәдениетті қалыптастыру жұмыстары да қарқынды жүргізіліп жатыр. Мемлекеттік әлеуметтік тапсырыс аясында 27 кездесу ұйымдастырылып, түрлі байқаулар, ақпараттық акциялар мен мурал жобалары жүзеге асырылған.

Сонымен қатар азаматтардың құқықтық сауаттылығын арттыру мақсатында ауқымды ақпараттық-түсіндіру жұмыстары қолға алынған. «Заң мен тәртіп» идеологиясын ілгерілету жөніндегі 2025–2030 жылдарға арналған тұжырымдама аясында өңірлік іс-шаралар жоспары бекітілген.

Жыл бойы 42 ірі профилактикалық және ақпараттық іс-шара өткізу жоспарланса, оның бір бөлігі қазірдің өзінде жүзеге асырылған. Жыл басынан бері бұқаралық ақпарат құралдары мен әлеуметтік желілерде 42 мыңнан астам материал жарияланған.

Сондай-ақ облыс аумағында заңдылық қағидаттарын насихаттау үшін 72 билборд, 24 баннер және 20 LED экран орнатылған. Қонаев қаласындағы тұрғын үй кешендерінде 700-ге жуық ақпараттық жадынама орналастырылған.

Комиссия отырысында Іле ауданында атқарылып жатқан жұмыстар да қаралды. Ауданда тұрғындардың құқықтық сауаттылығын арттыру мақсатында тоғыз іс-шара өткізіліп, жүздеген ақпараттық материал таратылған.

Ішкі талдау нәтижесінде ауданның бірнеше бөлімінде алты сыбайлас жемқорлық тәуекелі анықталып, оларды жою бойынша нақты шаралар қабылдануда.

Жиын қорытындысында облыс әкімі Марат Сұлтанғазиев мемлекеттік органдарға сыбайлас жемқорлықтың алдын алу бағытындағы жұмыстарды күшейтуді тапсырды. Сонымен қатар мемлекеттік сатып алулардың ашықтығын қамтамасыз ету, мүдделер қақтығысының алдын алу және ішкі талдау сапасын арттыру бойынша нақты міндеттер жүктеді.