Алматы прокуратурасы блогер Әділетхан Молдаханның ісіне қатысты пікір білдірді

Egemen.KZ парақшасындағы ақпаратқа сәйкес, Qazaq24.com хабар таратты..

Әлеуметтік желіде блогер Әділетхан Молдаханның ұсталғаны және оның қылмыстық құқықбұзушылыққа қатысы болуы мүмкін екені туралы ақпарат таралып жатыр. Осыған байланысты Алматы прокуратурасы бұған дейін қаралған істің мән-жайын түсіндіріп берді, деп жазады Egemen.kz.

Алматы қаласы Түрксіб ауданы прокуратурасы бөлімінің бастығы Дидар Қабаевтың айтуынша, әңгіме 2021 жылы жасалған қылмыс туралы болып отыр.

«Сол кезде мен Алматы қаласы Наурызбай ауданы прокуратурасында мемлекеттік айыптауды қолдау бөлімінің бастығы қызметін атқардым. Аталған іс бойынша мемлекеттік айыптаушы болған жоқпын. Алайда қылмыстық істің материалдары мен сот үкімін зерделедім. Істің қысқаша сипаттамасы мынадай: жәбірленуші Алматы қаласынан баспана сатып алмақ болып, 1,5 млн теңге көлемінде алдын ала төлем жасау үшін Тараз қаласынан келген. Бұл туралы оның танысы біліп, Әділетхан Молдаханмен бірге қылмыстық жоспар құрған. Олар жәбірленушіні жолда күтіп алып, жол-көлік апатын ұйымдастырған. Содан кейін ашық түрде 1,5 млн теңгені тартып алған. Кейін күдіктілер ұсталды. Оларға қатысты қамауға алу шарасы қолданылды», деді Дидар Қабаев.

Күдіктілер дер кезінде ұсталып, қамауға алынған. Дидар Қабаевтың айтуынша, іс қаралып жатқан кезде айыпталушылар кінәсін толық мойындап, келтірілген шығынды өтеген.

«Тергеу барысында олар кінәларын толық мойындап, келтірілген залалды өтеді. Қылмыстық іс Қылмыстық-процестік кодекстің 382-бабына сәйкес, қысқартылған тәртіппен қаралды. Қысқартылған тәртіп кінәні толық мойындауды және талап-арыздарды дауламауды көздейді. Мұндай жағдайда істің барлық материалы жан-жақты зерттелмейді, тек сотталушылар мен жәбірленушілер ғана жауап береді. Осыдан кейін жарыссөз басталып, сот үкім шығару үшін кеңесу бөлмесіне кетеді. Нәтижесінде сот әрқайсысына үш жыл мерзімге бас бостандығын шектеу жазасын тағайындады. Үкімге шағым түспеді және ол заңды күшіне енді», деді Дидар Қабаев.

Осылайша, Әділетхан Молдахан тонау қылмысын жасағаны үшін кінәлі деп танылды. Сот қылмыстың алдын ала ойластырылған жоспар бойынша, жол-көлік оқиғасын қолдан ұйымдастыру арқылы жасалғанын анықтады. Айыпталушылар кінәсін мойындап, келтірілген шығынды өтеген, нәтижесінде оларға үш жыл мерзімге бас бостандығын шектеу жазасы тағайындалды.

Бұған дейін заңгер әрі блогер Әділетхан Молдахан қамауға алынып, құқық қорғау органдары заңгерге қатысты жалған ақпарат тарату фактісі бойынша сотқа дейінгі тергеу жүргізіп жатқанын хабарлағанбыз.

Соңғы жаңалықтар