Алматы үздік туристік бағыттар қатарында тұр

Биыл Алматы қаласына келетін шетелдік туристердің қатары одан әрі артуы мүмкін.

Халықаралық сарапшылар мәдени астанамызды осы жылы әлемдегі ең танымал болатын туристік аймақтар қатарына қосты. Биыл салада тағы қандай жаңалықтар күтіп тұр?

Алматы биыл әлемдегі ең танымал туристік бағыттар қатарына кіреді. Bloomberg халықаралық басылымы елдің оңтүстік астанасын үздік 25 туристік аймақ тізіміне қосып отыр.

Сарапшылар Алатау баурайының туристік әлеуеті жыл бойы тұрақты екенін ескерген. Былтыр 9 айдың ішінде мегаполиске 2 млнға жуық саяхатшы барған. Олардың төрттің бірі шетелдіктер. Әсіресе тау шаңғысы көптің қызығушылығын тудырып отыр. "Шымбұлақ" курортына күніне мыңнан астам адам барады. Дегенмен, инфрақұрылымды әлі де жетілдіруді талап етіп тұр. Мұны Мемлекет басшысы "Түркістан" газетіне берген сұхбатында да атап өтті. Сондай-ақ бұл салада ауқатты адамдар мен табысы орташа азаматтарға бірдей қызмет көрсетілуге тиіс екенін айтты. Жергілікті әкімдік бұл бағытта "Алматы тау кластері" жобасы қолға алынын хабарлады. Бірінші кезекте дәл осы "Шымбұлақ" курорты жаңғыртылады.

Ақмарал Ещанова, қалалық туризм басқармасы басшысының орынбасары:

- Тау-шаңғы аймағын кеңейту және жаңғырту, қолданыстағы аспалы жолдарды модернизациялау, сондай-ақ Бұтақты шатқалында жаңа бағыттарды салу көзделген. Жобаның негізгі мақсаты – тау-шаңғы курортына келушілердің қатарын артырып, қауіпсіздік деңгейін күшейту және жаңадан бастаушылардан бастап, кәсіби шаңғышыларға дейінгі барлық санаттағы қонақтар үшін қолайлы әрі заманауи инфрақұрылым қалыптастыру.

Туризмді дамыту тұжырымдамасы толығады

Туризмді дамытудың 2029 жылға дейінгі тұжырымдамасы толықтырылып, түзетулер енгізіледі. Үкімет басшысы тиісті министрлік пен әрбір өңірдің әкімдігіне осындай тапсырма жүктеді. Туризм саласы экономиканың бірнеше секторын тоғыстырады. Сондықтан өзге де мемлекеттік органдардың жұмысын үйлестіру қажет. Оның ішінде Ғылым және жоғары білім министрлігімен бірге саладағы кадрлық мәселелерді шешу үшін қосымша шаралар қабылдау тапсырылды. Былтыр салаға салынған инвестиция көлемі 923 млрд теңгеге жетті. Алдыңғы жылдағы көрсеткішпен салыстырғанда 38 пайызға артқаны байқалады. Әр өңірдің жаңа дамыту бағдарламалары шеңберінде тағы инвестиция тартып, инфрақұрылымды дамыту міндеті тұр.

Мәдени-туристік іс-шаралар күнтізбесі бекітілді 

2026 жылға арналған мәдени-туристік іс-шаралар күнтізбесі жарияланды. Туризм және спорт министрлігі дайындаған құжатта 55 бастама көрсетілген. Олардың қатарында мұз үстіндегі сайыстар, қансонар, қолөнершілер көрмесі, қымызмұрындық және қызғалдақ фестивалі сияқты шаралар бар. Мұның бәрі Бурабай, Алтынемел, Аалакөл, Каспий, Алатау сияқты туристік аймақтарда өткізіледі. Оған шетелден мыңдаған туристер қатысады деп болжанып отыр.