Алматыда 11 жастағы қыз өрмелеу қабырғасынан құлап кетті

Алматыдағы сауда орталықтары бірінде жазатайым оқиға болды: скалодромда жаттығу кезінде 11 жастағы қыз биіктен құлап кетті. Ол ауыр жарақат алып, шұғыл ота жасалды, деп хабарлайды Tengrinews.kz тілшісі.

"Биіктен құлап кетті": әлеуметтік желідегі жазба

Куәгерлердің айтуынша, жазатайым оқиға 28 қазанда қаладағы сауда орталықтары бірінде болған.

"Қыз ең биік нүктеден құлап, бірден еденге түсті", - деді куәгерлер.

Қазір қыз №1 қалалық балалар ауруханасының нейрохирургия бөлімінде емделіп жатқаны белгілі болды.

"Науқасқа аралас жарақат, омыртқа мен жұлынның жабық жарақаты, сондай-ақ үшінші бел омыртқа денесінің үшінші дәрежелі компрессиялық сынуы диагнозы қойылды", - деді аурухана директорының орынбасары Тоқтар Құрметбек.

Оның айтуынша, зардап шегушіге шұғыл ота жасалды. Қазір жағдайы орташа ауыр дәрежеде деп бағаланып отыр, нашарлау байқалмайды.

Алматы полиция департаменті бұл дерек бойынша қылмыстық іс қозғалғанын хабарлады. Сотқа дейінгі тергеу амалдары жүргізіліп жатыр.

Оқиғаның мән-жайы, соның ішінде ойын-сауық орталығына келушілердің қауіпсіздігі талаптарының сақталуы анықталып жатқаны хабарланды.

Бізді Google-дың негізгі дереккөздер тізіміне қосыңыз