Қайрат Сатыбалдыұлының бұрынғы қонақүйі Алматыда сатылды: DoubleTree by Hilton қаншаға кетті

Алматыда бұған дейін Қазақстанның тұңғыш президентінің жиені Қайрат Сатыбалдыұлына тиесілі болған DoubleTree by Hilton қонақүйі сауда-саттық арқылы сатылды. Сауда қалай өткені және нысанның қанша сомаға өткені туралы – Tengrinews.kz материалында.

Алматыдағы DoubleTree by Hilton қаншаға сатылды?

DoubleTree by Hilton – Алматыдағы элиталық қонақүй. Оның ішінде қалаға қараған нөмірлер, жабық бассейні мен шезлонгтары бар SPA-аймағы, фитнес-орталық, мейрамханалар, сондай-ақ іскерлік кездесулер мен іс-шараларға арналған конференция залдары орналасқан.

Қонақүйді тек үшінші талпыныстан кейін сату мүмкін болды.

Қайталанған сауда-саттық алдында оның бастапқы құны үш есеге өсті, алайда аукцион кезінде баға біртіндеп төмендеді.

DoubleTree by Hilton қонақ үйінің интерьері. e-Qazyna.kz порталынан алынған фото

Нәтижесінде DoubleTree by Hilton 12 миллиард 384 миллион 291 мың 448 теңгеге сатылды.

DoubleTree by Hilton-ды сату туралы лот. Фото: e-Qazyna.kz порталынан

Алғашқы сауда емес және баға үш есе өсті

Қайрат Сатыбалдыұлының Алматыдағы қонақүйін сату әрекеті бірінші рет емес. Алайда бұл жолы бастапқы баға үш есе шарықтап кетті.

Құны қалай өзгерді: Бірінші әрекет 2026 жылғы 25 қыркүйек. Қонақүйді бағаны көтеру әдісімен өтетін аукционда 12,7 миллиард теңге бастапқы құнымен сатпақ болды. Алайда бірде-бір өтінім түспегендіктен, сауда өтпеді деп танылды. Екінші әрекет кеше, 13 қазанда. Нысан тағы сол 12,7 миллиард теңге бастапқы құнымен саудаға шығарылды, жалғыз қатысушыға сатуға да рұқсат етілді. Бірақ оны тағы ешкім сатып алмады.

Енді бастапқы меже рекорд 38 278 230 000 теңгеге дейін көтерілді, бұл бастапқы бағалаудан үш есе жоғары. Сауда 29 қазанда сағат 10:00-де өтеді. Сауда-саттықтың жалғыз қатысушысына сатуға рұқсат беріледі.

Алматыдағы DoubleTree by Hilton қонақүйі саудада. e-Qazyna.kz деректері

Аукцион бағаны төмендету әдісімен өтеді.

DoubleTree by Hilton қонақүйі шын мәнінде қанша тұрады?

Тәуелсіз бағалаушылардың мәліметінше, қонақүй ғимараты 12 759 410 000 теңге тұрады.

Алматыдағы DoubleTree by Hilton қонақүйін тәуелсіз бағалау деректері. e-Qazyna.kz құжаттары

Қонақүй иесі қалай ауысты?

DoubleTree by Hilton қонақүй ғимараты сыйға тарту шарты бойынша мемлекет меншігіне өтті. Құжатқа 2023 жылғы 18 қыркүйекте Қайрат Сатыбалдыұлы мен Алматы қалалық мемлекеттік мүлік департаменті қол қойды.

Бұған дейін экс-президенттің жиеніне қатысты атышулы бірқатар қылмыстық іс қозғалған болатын:

2022 жыл: Сатыбалдыұлы 6 жылға бас бостандығынан айырылды. Сот пен тергеу оның "Қазақтелеком" АҚ-на 12 миллиард теңгеден аса шығын келтіргенін, сондай-ақ "Көлік сервисі орталығы" АҚ мүлкін жымқыруға қатысы барын анықтады. 2023 жыл: кәсіпкерге қатысты жаңа эпизодтар бойынша тергеу жалғасты. Қаңтарда Сатыбалдыұлы ақша жылыстату бойынша кінәсін толық мойындады.
Шығынды өтеу аясында оның бірқатар ірі активтері тәркіленіп, мемлекетке берілді. Олардың қатарында DoubleTree by Hilton қонақүйі де болды – ол кезде нысан 6,49 миллиард теңгеге бағаланған.

DoubleTree by Hilton қонақүйін "күшпен тартып алу" туралы кім және неге айтқаны, сондай-ақ Қайрат Сатыбалдыұлынан тағы қандай активтер тәркіленгені туралы толығырақ мына сілтеме арқылы оқыңыз.

Бізді Google-дың негізгі дереккөздер тізіміне қосыңыз

Қосу