Алматыда 2026 жылы жаңа арқан жолдар мен шаңғы трассалары салына бастайды

Оның сөзінше, Шымбұлақ пен Ой-Қарағай тау курорттарын аспалы арқан жолдарының желісі мен тау шаңғы жолдары арқылы біріктіру жоспарланған.

— Бірінші кезең келесі жылы басталады. Ол бойынша Шымбұлақ тау шаңғысы курортында 2 жаңа аспалы жол және 16 шақырымдық трасса, ал Кімасарда 4 аспалы жол мен 18 шақырымға дейінгі трасса салынады. Екінші кезең Бутаковка (5 аспалы жол пен 22 шақырым трасса) және Ой-Қарағай (4 аспалы жол мен 12 шақырым трасса) аумақтарының дамуын қамтиды. Бұл кезеңді жүзеге асыру 2027–2028 жылдарға жоспарланған. Үшінші кезең — Пионер аймағын игеру, ол екінші кезеңмен қатар жүреді. Мұнда 4 аспалы жолы, 20 шақырымға дейінгі трассалар жабдықталады, — деді ол.

Жалпы Алматы тауларында аспалы арқан жолдардың саны 16-дан 42-ге дейін ұлғаяды. Ал сырғанауға жарамды трассалар 41 шақырымнан 112-162 км-ге дейін ұзарады.

Өңірлік коммуникациялар қызметінде өткен брифинг барысында Олжас Смағұлов Алматы тау кластерін дамыту жобасы неліктен қажет екенін атап өтті. Сондай-ақ «жоба тау экожүйесіне қауіп төндірмей ме» деген сұраққа жауап берді.

— Бұл жобаны таудағы жаппай құрылыс ретінде емес, ретсіз туризмнен қорғаныс ретінде қарастырамыз. Бүгінгі күні тауға шығатындар көп, «Шымбұлаққа» демалыс күндері 15 мыңдай адам барады. Бұл басында жобаланған адамдар санынан екі есе көп. Басты талабымыз — экологияға зиян келтірмей тау кластерін дамыту. Сондықтан жобалар жүзеге асырылған кезде барлық экологиялық талаптар ескеріледі. Бұл жобалардың арқасында мыңдаған жұмыс орны ашылады, 100 млрд теңгедей млрд салық түседі деп күтеміз. Бұл бағытта біздің көршілеріміз — Өзбекстан, Қырғызстан үлкен жұмыс жүргізіп жатыр, сондықтан тау туризмінде бәсекелестік жоғары. Бірақ біздің мақсатымыз — жұмысты заң аясында дұрыс орындау, — деді ол.

Еске салайық, бұған дейін Алматы тау кластері қалай дамитынын жазғанбыз.