Украинадағы қақтығысты тоқтатуға келіссөз көмектеседі Словакия СІМ

АСТАНА, 31 мамыр – Sputnik. Украинадағы қақтығысты тоқтатуға Киевке қару-жарақ жеткізу емес, диалог жүргізу көмектеседі, деп мәлімдеді Словакия СІМ басшысы Юрай Бланар.

"Еуропалық одақ… біздің үкіметіміз айтып келе жатқан шындықты әлі де мойындағысы келмейді: Украинадағы соғысты жаңа қару-жарақ жеткізуді қаржыландыру арқылы емес, белсенді диалог жүргізу арқылы аяқтауға болады", – деп жазды Бланар жұма күні әлеуметтік желідегі парақшасында.

2023 жылдың күзінде Словакияда Роберт Фицо үкіметі билікке келгеннен кейін, мемлекеттік қорлардан Украинаға әскери көмек беру тоқтатылды. Алайда ел Украинаға гуманитарлық көмек көрсетуді жалғастырып келеді: электр энергиясы, минадан тазарту техникасы, генераторлар жеткізіліп жатыр.

Ресей Украинаға қару-жарақ жеткізу қақтығысты реттеуге кедергі келтіреді, НАТО елдерін қақтығысқа тікелей тартады және оларды "отпен ойнап жатыр" деп санайды. Ресей сыртқы істер министрі Сергей Лавров Украинаға арналған қару-жарақ тиелген кез келген жүк Ресей үшін заңды нысанаға айналатынын мәлімдеді.