Алматыда 885 отбасы жаңа пәтердің кілтін алды

Алматы қаласының әкімі Дархан Сатыбалды тұрғын үй жағдайын жақсартуға мұқтаж отбасыларға жаңа пәтер кілттерін табыстау рәсіміне қатысты.

Қала әкімдігінің мәліметінше, бағдарламаның алғашқы кезеңінде коммуналдық тұрғын үй қорынан 885 отбасы баспанамен қамтамасыз етіледі.

Алматылық жастар жобасы үшін 5 млн теңгеге дейін қаржы ала алады: Қалай қатысуға болады?

Салтанатты рәсімде сөз сөйлеген қала әкімі халықты қолжетімді тұрғын үймен қамтамасыз ету мемлекеттің әлеуметтік саясатының негізгі басымдықтарының бірі екенін атап өтті.

«Мемлекет басшысы Қасым-Жомарт Тоқаевтың тапсырмасы бойынша азаматтардың әл-ауқатын арттыру – мемлекеттік саясаттың маңызды бағыттарының бірі. Әсіресе, мемлекет қолдауына мұқтаж азаматтарды тұрғын үймен қамтамасыз етуге ерекше көңіл бөлінеді. Биыл Алматыда 11 мыңнан астам мұқтаж азаматтың тұрғын үй жағдайын жақсарту жоспарланып отыр», деді Дархан Сатыбалды.

Әкімнің айтуынша, алғашқы кезеңде 885 пәтер берілсе, екінші кезеңде 1832, үшінші кезеңде 670, ал төртінші кезеңде 6161 пәтерді табыстау көзделген. Осылайша, жыл соңына дейін мыңдаған алматылық отбасы баспана мәселесін шешуге мүмкіндік алады.

Жалпы, 2026 жылы Алматыда 8250 азаматты жалдамалы тұрғын үймен қамтамасыз ету жоспарланған. Бұдан бөлек, 1298 адам жеңілдетілген несие бағдарламалары арқылы пәтер сатып алса, кемінде 1650 жас маман «Алматы жастары» бағдарламасы аясында жеке баспаналы болады.

Сонымен қатар әлеуметтік осал топтарға ипотекалық несие рәсімдеу кезінде бастапқы жарнаның бір бөлігін өтеуге арналған тұрғын үй сертификаттары беріледі. Биыл мұндай 200 сертификат табыстау жоспарланған.

Алматыда электрсамокаттардың жылдамдығын арттыру туралы петиция жарияланды

Бұдан бөлек, жалдамалы пәтерде тұратын азаматтарға жалдау ақысының бір бөлігін субсидиялау тетігі де жалғасады. Бұл шара мұқтаж отбасылардың қаржылық жүктемесін азайтып, тұрғын үйдің қолжетімділігін арттыруға бағытталған.