Алматыда балалар арасында желшешектің асқынған түрі жиілеп кетті

Бұл туралы Қалалық балалар клиникалық жұқпалы аурулар ауруханасының директоры Ержан Сералин айтты.

Оның мәліметінше, биыл қалада 183 бала әртүрлі ауырлық дәрежесімен ауруханаға жатқызылған. Күрделі формалар саны былтырмен салыстырғанда 40,9% артқан, оның ішінде орталық жүйке жүйесі мен тыныс алу жолдарының зақымдануы көбейген.

— Желшешек көбіне мектепке дейінгі және бастауыш сынып жасындағы балаларда (жалпы сырқаттанғандардың 61,7%-ы) тіркеледі. Себебі бұл инфекцияға қарсы вакцина Ұлттық егу күнтізбесіне енгізілмеген, сондықтан ұжымдық иммунитет тек ауруды өткергендердің есебінен қалыптасады, — деді Ержан Сералин.

Аурухана басшысының айтуынша, 1-14 қазан аралығында аурухананың жансақтау және қарқынды терапия бөлімшесіне 14 бала түскен. Олардың арасында екіжақты пневмония, жедел ішек инфекциясы, тырысу синдромы және тыныс алу жеткіліксіздігімен ауырғандар бар.

— Кейбір балалар ауруханаға тым кеш әкелінеді, ата-аналар аурудың 8-10-күні ғана жүгінеді. Бұл жағдайдан емдеу қиындап, асқынып кетеді, — деді Сералин.

Еске салайық, бұған дейін Алматыда ЖРВИ жұқтырғандардың саны 20 мыңға жақындағанын жазғанбыз.