Алматыда балаларды оңалту саласында инновациялық бағыт енгізілді

Алматы қалалық балаларды оңалту орталығында ақыл-ой кемістігі бар балаларды тәрбиелеп отырған отбасыларды қолдауға бағытталған жаңа жоба –  Smart Mental  саналы ойлау мектебі жұмысын бастады. Бұл туралы Алматы қаласы Қоғамдық денсаулық сақтау басқармасының өкілдері айтты, – деп хабарлайды Aikyn.kz. 

Негізгі мақсат – отбасыларға балалардың мінез-құлқы мен қажеттіліктерін тереңірек түсінуге, күнделікті қиындықтарды сенімді түрде еңсеруге және оңалту процесіне саналы түрде қатысуға көмектесу.  Мектеп аясында педагогтер, психолог және логопед-дефектологтердің қатысуымен практикалық сабақтар өткізіледі. Ата-аналар қолжетімді әрі қолданбалы білім алып, үй жағдайында пайдалануға болатын дағдыларды меңгереді.

Бұл дағдылар психо-сөйлеу дамуы тежелген, аутизм спектрінің бұзылыстары, Даун синдромы және басқа да интеллектуалдық бұзылысы бар балалармен қарым-қатынаста, оқытуда және күнделікті күтімде қолданылады.  Оқу бағдарламасын аяқтаған қатысушыларға оны өткені туралы куәлік беріледі.  Орталық мамандарының айтуынша, жұмыстың бұл форматы мамандар мен отбасы арасында серіктестік орнатуға мүмкіндік береді және әр бала үшін оңалту процесінің тиімді әрі тұрақты болуына ықпал етеді.  Қалалық балаларды оңалту орталығына жолдаманы міндетті әлеуметтік медициналық сақтандыру (МӘМС) аясында тіркелген жері бойынша емханадан тегін алуға болады.

Сараптама, зерттеу мақала, күнделікті өзекті ақпаратты «Айқынның»   TELEGRAM арнасынан табасыз.