Алматыда кене шағу жағдайларының артуы: мыңнан астам зардап шеккендер

Алматы тұрғындары кене шағу оқиғалары жиілеп кеткеніне шағымданып жатыр. Ресми мәліметтерге сәйкес, зардап шеккендер саны мыңнан асты - тек кейінгі апталарда медициналық мекемелерге 1142 адам жүгінген, деп хабарлайды TengriHealth.

Алматы тұрғындары кене шағу оқиғалары жиілеп кеткеніне шағымданып жатыр. Ресми мәліметтерге сәйкес, зардап шеккендер саны мыңнан асты - тек кейінгі апталарда медициналық мекемелерге 1142 адам жүгінген, деп хабарлайды TengriHealth.

Қанша адам зардап шекті?

Әлеуметтік желіде Алматы тұрғындарының бірі баласын үй ауласындағы ойын алаңында кене шағып алғанын айтты.

"Бұл біздің қала орталығында тұратынымызға қарамастан болып отыр. Балалар ауруханасына барғанымызда, алдымызда кене шаққан тағы алты бала кезекте тұрды. Екпе салдырдық. Биыл кене қаптап кетті", - деп жазды ол.

Алматы санитарлық-эпидемиологиялық бақылау департаменті басшысының орынбасары Әсел Қалықованың мәліметінше, бүгінде қаланың медициналық мекемелеріне кене шағу шағымымен 1142 адам жүгінген. Бұл былтырғы сәйкес кезеңмен салыстырғанда 19 пайыз көп.

Бұл ретте, осыдан 19 күн бұрын 334 шағым тіркелген болатын, зардап шеккендердің жартысы 14 жасқа дейінгі балалар.

Мамандар биыл көктемнің жылы болуына байланысты жәндіктердің белсенділік маусымы әдеттегіден ерте басталғанын айтты. Алғашқы шағу оқиғалары наурыздың басында-ақ тіркеле бастаған.

"Сонымен қатар жүгінгендер жалпы саны әзірге қалыпты көрсеткіш шегінде қалып отыр, көпжылдық орташа мәннен аспайды", - дейді Әсел Қалықова.

Маман қаланың травматологиялық пункттеріне жүгінгендердің барлығына уақтылы шұғыл медициналық көмек көрсетілгенін атап өтті. Көрсетілімдер болған жағдайда оларға кенеге қарсы иммуноглобулин егілген.

Кене көбінесе қай жерде шағады?

Зардап шеккендер арасында жүргізілген сауалнамаға сәйкес, кене шағу оқиғаларының басым бөлігі мына жерлерде болған:

жеке үйлер аумағында - 37,2 пайыз; қала сыртында - Алматы, Жетісу және басқа да облыстарда - 35,2 пайыз; Алматы маңында - 18,9 пайыз; көпқабатты тұрғын үйлер маңында - 4,8 пайыз; саябақтар мен скверлерде - 3 пайыз.

Осылайша, негізгі қауіп жеке сектор мен табиғи аймақтарға тиесілі болып отыр.

Еске сала кетейік, Алматы маңы кене энцефалиті мен кене боррелиозы сияқты инфекцияларды тарататын иксод кенелері көп кездесетін эндемиялық аймаққа жатады.

Анықтама. Кене энцефалиті - вирус жұққан кененің шағуы арқылы адамға берілетін және ең алдымен бас миы мен жұлынды зақымдайтын вирустық ауру.

Анықтама. Кене боррелиозы (Лайм ауруы) - теріні, буындарды, жүректі және жүйке жүйесін зақымдайтын бактериялық инфекция.

Бұған дейін қала тұрғындарының кенені көргені туралы хабарламалар жалпы алғанда күтілетін жағдай екенін жазған болатынбыз. Көктемде олардың белсенділігі табиғи түрде артады, соған байланысты таулы және табиғи аймақтарда оларды кездестіру қаупі жоғары.

Мамандардың айтуынша, кенелердің белсенділік маусымы сәуірден қазанға дейін созылады, ал оның ең жоғарғы шегі мамыр мен маусымға сәйкес келеді.

Бүгінде кене инфекциясын жұқтыру жағдайлары тіркелген жоқ.

Залалсыздандыру жұмыстары жүргізілді, бірақ кене қайта пайда болуы мүмкін

Алматыда кенеге қарсы өңдеудің бірінші кезеңі жүргізілді - 26 наурыз бен 30 сәуір аралығында саябақтар мен скверлер залалсыздандырылды.

Екінші кезең мамырға жоспарланған және ол ауа райы жағдайына байланысты болады. Бұл ретте Әсел Қалықова мынаны баса айтты:

"Кене - табиғи экожүйенің бір бөлігі. Өңдеуден кейін олар қайта пайда болуы мүмкін, оларды толықтай жойып жіберу мүмкін емес. Кенеге қарсы өңдеу шаралары олардың санын қауіпсіз деңгейде ұстап тұруға және халық көп жиналатын орындарда шағу ықтималдығын азайтуға бағытталған".

Белсенділік кезеңінде мамандар қарапайым сақтық шараларын сақтауға кеңес береді:

ашық түсті, жабық киім кию, шалбардың балағын шұлықтың ішіне салу; бас киім кию; репелленттерді пайдалану; серуендеу кезінде өзіңізді және жақындарыңызды үнемі тексеріп отыру; үйге оралған соң киім мен денені мұқият тексеру.

Бұған дейін біз кене энцефалитіне қарсы жоспарлы вакциналау кімдерге ұсынылатыны туралы жазған болатынбыз. Толығырақ мына жерден оқыңыз мына жерден оқыңыз.

Тағы оқыңыз: Орнын сіріңкемен күйдіру керек пе? Сарапшы қарақұрт шаққанда не істеу керек екенін айтты

Google News арқылы жаңалықтарымызды қадағалаңыз

Жазылу

жәндіктер

Алматы

вакцина