Алматыда LRT құрылысы 2027 жылы басталуы мүмкін

Алматы қаласында LRT желісінің құрылысын 2027 жылы бастау жоспарланып отыр.
Жобаның техникалық-экономикалық негіздемесі дайындалып, қоғамдық талқылауға шығарылды. Құжат қаланың жол инфрақұрылымын дамыту басқармасының тапсырысымен әзірленген, бас жобалаушы – Метропроект ЖШС.

Жоспар бойынша LRT депосы ЖЭО-2 маңында, Фариза Оңғарсынова, Мөңке би және Бауыржан Момышұлы көшелерінің аралығында орналасады. Желі Бауыржан Момышұлы көшесімен Төле би көшесіне дейін, одан әрі Төле би көшесі арқылы Абылай хан даңғылына дейін жалғасып, кейін солтүстікке қарай бұрылып Алматы-2 теміржол вокзалы бағытына дейін барады. Соңғы аялдама «Райымбек батыр» көлік-ауысып отыру торабы аумағында орналасады.

Бірінші желінің ұзындығы шамамен 17,9 шақырым болады. Ол «Дарабоз», «13», «Ғажайып», «Нұркент» шағын аудандарын, сондай-ақ «Алатау сити» мен «Алмалы» тұрғын үй кешендерін қаланың орталығымен байланыстырады. Желі бойында барлығы 34 трамвай платформасы қарастырылған.

Техникалық-экономикалық негіздемеге сәйкес, құрылыс 24 айға созылады. Оның ішінде дайындық кезеңі шамамен 7 айды қамтиды. Жобаны іске асыру мерзімі 2027–2029 жылдарға жоспарланған: құрылыс 2027 жылдың екінші тоқсанында басталып, 2029 жылдың екінші тоқсанында аяқталуы мүмкін.

Құжатта болашақта LRT желісінің екінші кезеңін салу жоспарланғаны да көрсетілген. Ол «Барлық» көлік-ауысып отыру торабынан Бауыржан Момышұлы көшесіне дейін созылып, «Алматы-2» вокзалын «Шығыс қақпасы» полиорталығымен байланыстыруы мүмкін.

Айта кетейік, Алматыда LRT салу идеясы 2018 жылдан бері талқыланып келеді. Жоба бұрын қаржылық мәселелерге байланысты бірнеше рет кейінге шегерілген.