Алматыда пәтер бағасы күрт қымбаттады

Алматыда тұрғын үй бағасы айтарлықтай өсті. Бір ай ішінде алғашқы нарықта баға 2,9%-ға, ал қайталама нарықта 2,1%-ға қымбаттады. Орташа алғанда, Қазақстан бойынша өсім сәйкесінше 1% және 0,9% болды, деп хабарлайды Arasha.kz.

Ұлттық статистика бюросының дерегінше, мегаполистегі жаңа тұрғын үйлердің бағасы бір айда 2,9%-ға, ал ескі пәтерлердің бағасы 2,1%-ға көтерілген. Салыстыру үшін: Астанада баға өсімі тіркелмеген, ал ел бойынша жаңа үйлер 1%-ға, қайталама нарықтағы пәтерлер 0,9%-ға қымбаттаған.

Ай сайынғы көрсеткіш бойынша жаңа тұрғын үйлердің бағасы Атырауда (-0,1%), Көкшетауда (-0,6%) және Павлодарда (-0,5%) төмендеді. Қайталама нарықта баға Талдықорғанда (-0,7%), сондай-ақ Қонаев пен Өскеменде (-0,9%) азайған.

Бір жыл ішінде Қазақстан бойынша жаңа тұрғын үйдің орташа шаршы метрі 12,5%-ға, ал қайталама нарықтағы пәтерлер 10,2%-ға өскен. Алматыда бұл көрсеткіштер әлдеқайда жоғары — тиісінше 15,7% және 21,7%. Астанада өсім 13,7% және 4,4%, Шымкентте — 13,5% және 9,5%.

Қазан айының қорытындысы бойынша ең қымбат тұрғын үй Алматыда сатылуда. Алғашқы нарықтағы бір шаршы метрдің орташа бағасы — 667 027 теңге, ал қайталама нарықта — 716 112 теңге.

Одан кейін Астана тұр — мұнда жаңа тұрғын үйдің орташа бағасы 650 133 теңге, ал ескі пәтерлер 678 190 теңге тұрады.

Қазақстан бойынша орта есеппен жаңа тұрғын үйдің бір шаршы метрі 555 161 теңге, ал қайталама нарықтағысы — 571 828 теңге.

Ең арзан жаңа тұрғын үйлер Оралда (299 155 теңге), ал ең арзан қайталама пәтерлер Қызылордада (312 596 теңге) сатылады.

Сонымен қатар жалдамалы тұрғын үй бағасы да айтарлықтай өсіп келеді: бір айда — орта есеппен 1,2%-ға, ал бір жылда — 8,2%-ға артқан.

Бұған дейін кейбір қалаларда жалдамалы пәтердің айлық бағасы 500 мың теңгеден асып түсетіні хабарланған еді. Сондай-ақ сарапшылардың пікірінше, Қазақстандағы тұрғын үй бағасы ресми статистика көрсеткеннен де жылдам өсіп жатыр.