Алматыдағы үй маңындағы тегін тұрақ жоба қай кезеңде және ол туралы не белгілі

Алматыдағы көпқабатты үйлердің тұрғындары маңайдағы ақылы тұрақтарды тегін пайдалана алады. Алайда тиісті жүйе әлі іске қосылған жоқ: ережелер жобасы әлі қарастыру сатысында және бірқатар процедурадан өтуі тиіс, - деп хабарлайды Tengri Auto.

Бұған дейін Алматы әкімдігі қалада жол қозғалысын ұйымдастыру ережелеріне, соның ішінде көпқабатты үй тұрғындары үшін коммуналдық ақылы тұрақтарды тегін пайдалану механизміне өзгерістер енгізуді жоспарлап отырғанын хабарлаған болатын.

"Алматы паркинг" компаниясы мәліметінше, ережелер жобасын қалалық мәслихат депутаттары әлі қарап, ресми түрде жариялауы тиіс. Осыдан кейін мамандар жаңа механизмді іске қосуға қажетті ақпараттық жүйелерді баптайды.

Көлік иелерінен өтініштер қабылдау барлық процедура аяқталып, ережелер күшіне енгеннен кейін басталады. Іске қосылатын күні Алматы қалалық мобильділік басқармасы мен "Алматы паркинг" компаниясының ресми ресурстарында қосымша хабарланады.

Тегін тұраққа рұқсатты қалай алады және ол кімдерге арналған?

Рұқсат алу үшін тұрғындарға e-Otinish цифрлық сервисі арқылы өтініш беру қажет болады. Бұл ретте жаңа мүмкіндікті барлық көлік иесі бірдей пайдалана алмайды.

Ережелер жобасына сәйкес, өтініш беруші бір мезгілде келесі талаптарға сай болуы тиіс:

көпқабатты тұрғын үйден пәтер иесі болуы немесе тіркелген жалдау шарты болуы керек; көлік құралының иесі болуы тиіс.

Қажетті құжаттар тізімін "Алматы паркинг" жаңа ережелер бекітілгеннен кейін жариялауға уәде берді.

Сонымен қатар, тегін рұқсат алу автокөлікке нақты бір тұрақ орнын бекітіп беруді білдірмейді. Бұған дейін айтылғандай, бұл тұрғылықты жері маңындағы белгілі бір аймақта тұрақтарды пайдалануға мүмкіндік береді.

Компания бұл өзгерістер көпқабатты үйлер ауласындағы тұрақ орындарының тапшылығы мәселесіне байланысты екенін атап өтті. Жер аумағының шектеулі болуына байланысты тұрғындар жиі көліктерін жақын маңдағы коммуналдық ақылы тұрақтарға қалдыруға мәжбүр.

Еске салайық, қала тұрақтарына көліктерін тегін қалдыра алатын тұлғалардың тізіміне мыналар енуі мүмкін:

ардагерлер; мүмкіндігі шектеулі жандар; көпбалалы аналар; ядролық сынақтардан зардап шеккендер, сондай-ақ электромобиль иелері.

Сондай-ақ жобада тегін уақыт аралықтарын жасау ұсынылады. Мәселен, тротуарлық тұрақтарда 5 минут, ал алаңдық тұрақтарда - 10 минут тегін тұруға болады.

Google News арқылы жаңалықтарымызды қадағалаңыз

Жазылу