Зайсандағы жаңа әуежай қандай болады жоба туралы не белгілі

Сәтбай ауылы маңындағы әуе айлағының құрылысы бір жарым жылға созылды - жұмыс 2025 жылдың наурызында басталған болатын. Tengri Travel ШҚО жолаушылар көлігі және автомобиль жолдары басқармасынан әуежайдың қазіргі жай-күйі мен жолаушылар қашан ұша алатынын анықтап көрді.

Әуежайдың қазіргі көрінісі

Жолаушылар көлігі басқармасы әуежай 93,7 пайызға дайын екенін және құрылыс аяқталу сатысында тұрғанын хабарлады.

"Зайсан (Сәтбай) әуежайы құрылыстың аяқталу сатысында. Нысанның жалпы құрылыс дайындығы 93,7 пайыз. Аэродром бөлігі бойынша негізгі жұмыстар, соның ішінде ұшу-қону жолағы, перрон, такси жолы, периметрлік және кіреберіс жолдары, DVOR радиомаягы, су бұру жүйесі, сыртқы байланыс және электрмен жабдықтау желілері, сондай-ақ жарық беру-сигналдық жабдықтарының құрылысы аяқталды", - деп атап өтті басқарма.

Зайсан әуежайы. Фото: ШҚО Көлік басқармасы

Қазіргі уақытта әуежай кешенінің жекелеген нысандары бойынша жұмыстар жүргізіліп жатыр.

"Бүгінде әуежай кешенінің нысандары бойынша, соның ішінде аэровокзал, инженерлік және авариялық-құтқару инфрақұрылымының ғимараттары мен құрылыстары, жабдықтардың жекелеген түрлерін монтаждау және аумақты абаттандыру бойынша жұмыс жалғасып жатыр", - деп хабарлады әуежай.

Басқарма мәліметінше, әуежай құрылысын 2026 жылдың аяғына дейін аяқтау жоспарланған.

Зайсан әуежайы. Иллюстрация: ШҚО Көлік басқармасы

Қанша адам жұмыс істейді?

Өңірлік басқарма өкілдері әуежайда 126 адам жұмыс істейтінін айтты.

"Штаттық кестеге сәйкес әуежай қызметін қамтамасыз ету үшін 126 штаттық бірлік қарастырылған. Жаңа Зайсан әуежайы пайдалануға берілгеннен кейін оның кадрлық құрамын негізінен Зайсан әуежайының қазіргі қызметкерлері есебінен қамтамасыз ету көзделіп отыр. Олар лауазымдық міндеттері мен біліктілік талаптары ескеріле отырып, жаңа нысанда жұмысын жалғастыруға ауыстырылады", - деп атап өтті ведомство.

Ал қызметкерлерді дайындау үшін Өскемен әуежайы базасында арнайы оқыту курстары өткізіледі.

"Сонымен қатар әуежайды білікті кадрлармен қамтамасыз ету мақсатында және "Қазаэронавигация" РМК талаптарына сәйкес, әуежайларда жұмыс істеуді жоспарлап отырған азаматтар тиісті кәсіптік оқудан және жұмыс берушінің базасында тағылымдамадан өтуі тиіс. Осыған байланысты, қысқа мерзімді кәсіптік оқыту бойынша жұмыспен қамту бағдарламасы аясында "Өскемен әуежайы" АҚ базасында әлеуетті қызметкерлерді оқыту мен тағылымдамадан өткізу ұйымдастырылды", - деп хабарлады көлік басқармасы.

Зайсаннан қайда ұшуға болады?

Басқарма мәліметінше, қазір әуекомпанияларды тарту және маршруттық желіні қалыптастыру бойынша келіссөздер жүргізіліп жатыр. Халықаралық бағыттарды іске қосу бойынша жұмыс атқарылып жатыр, әзірге тек ішкі рейстер туралы белгілі:

Өскемен; Алматы; Астана. Жаңа әуежайда не болады?

Ведомство әуежайда барлық қажетті инфрақұрылым жасақталатынын нақтылады: жолаушыларға арналған терминалдар, авиациялық қауіпсіздік және құтқару қызметтері, сондай-ақ метеоқамтамасыз ету, байланыс, электрмен жабдықтау және су бұру жүйелері болады.

Еске сала кетейік, Зайсандағы әуе айлағының құрылысы 2025 жылдың наурызында қаладан шамамен 25 шақырым жердегі Сәтбай ауылы маңындағы бұрынғы әскери аэродром базасында басталған болатын. Жобаға климат пен көлік логистикасы ескеріліп, ауданы шамамен 184 гектар жер телімі бөлінді.

Жоба ұзындығы 2200 метр болатын ұшу-қону жолағын салуды көздейді. Ол Bombardier Q400 және ATR-72 сияқты әуе кемелерін қабылдай алады. Сонымен қатар әуежайда төрт әуе кемесіне арналған перрон және ауданы 4 мың шаршы метрге дейінгі жолаушылар терминалы бой көтереді. Терминал сағатына 150 жолаушыға қызмет көрсетуге есептелген.

Нысан пайдалануға берілгеннен кейін Астана, Алматы және Өскеменге қатынайтын ішкі рейстерден бөлек, Қытайға - Үрімжі, Алтай және Қанас қалаларына халықаралық бағыттарды ашу жоспарланған.

Тағы оқыңыз: Балқаш әуежайының “прайм-дәуірі“ басталды: аспашам, жүк және қайтарылған активтер туралы

Бізді Google-дың негізгі дереккөздер тізіміне қосыңыз

Қосу