Алматылық студенттер мен оқытушылар ел дамуына қатысты бастамаларды талқылады

Алматыда жаңа Конституция жобасы мен референдум өткізу мәселелері бойынша жария талқылаулар жалғасуда, деп хабарлайды Arasha.kz.

Алматыда 15 наурызда өтетін республикалық референдумға арналған іс-шаралар белсенді түрде ұйымдастырылуда.

Алматыда «Әділетті және Прогрессивті Қазақстанның Халық Конституциясы үшін!» Жалпыұлттық коалициясының мүшелері Қазақ ұлттық аграрлық зерттеу университетінің профессор-оқытушылар құрамы мен студенттерімен кездесті.

Іс-шараның мақсаты – жаңа Конституция жобасының мазмұнын түсіндіру, сондай-ақ конституциялық реформалардың мәнін талқылау болды.

Парламент Сенатының депутаттары реформалардың мемлекеттік басқару жүйесін жетілдіруге, заң үстемдігін нығайтуға, азаматтардың құқықтары мен қауіпсіздігін қорғауды күшейтуге бағытталғанын атап өтті.

– Қазақстан Халық Кеңесін – бүкіл халықтың мүддесін білдіретін жоғары консультативтік органды құру қоғамдық диалогты институционалдандыру жолындағы маңызды қадам болып табылады. Халық кеңесі заң шығару бастамасы құқығына ие бола отырып, ішкі саясат бойынша ұсыныстар әзірлеу, қоғамдық келісімді нығайту және жалпыұлттық құндылықтарды ілгерілету алаңына айналады, – деп атап өтті сенатор Нурия Ниязова.

Кездесу барысында аграрлық ғылымды дамыту, агроөнеркәсіптік кешенге инновациялық технологияларды енгізу, ғылыми нәтижелерді өндіріске тиімді трансферттеу және бәсекеге қабілетті кадрлар даярлау мәселелері де қарастырылды.

Сонымен қатар Қазақ ұлттық университетінде Парламент Сенаты депутаттарының университет студенттері мен оқытушыларымен кездесуі өтті. Кездесудің басты тақырыбы – жаңа Конституция жобасын түсіндіру болды.

Кездесуге қатысушылар мемлекеттік институттардың тиімділігі мен жаңа саяси мәдениетті қалыптастыру мәселелерін талқылап, жастардың ел тағдырына саналы түрде қатысуының маңыздылығын атап өтті.

Сенат депутаты Дархан Қыдырәлі жаһандық бәсекелестік жағдайында елдің жедел дамуы қажеттігіне ерекше назар аударды.

– Тек инерциямен өсіп келген кезең артта қалды. Бүгінде қысқа уақытқа болса да артта қалу елеулі шығындарға алып келуі мүмкін, – деді сенатор.

Ол сондай-ақ ғылым, білім және технологиялық даму басымдықтары Конституция жобасында көрініс тапқанын атап өтті.

ҚазҰУ профессоры, заң ғылымдарының докторы Еркін Дүйсенов ұсынылып отырған түзетулердің ауқымы іс жүзінде жаңа Негізгі заңды қабылдауды білдіретінін айтты.

– Бүгінде жаңа Конституция жобасына 84 % өзгеріс енгізілді. Бұл енді жаңа Конституция туралы сөз болып отырғанын білдіреді, – деді ол.

Еске сала кетейік, Мемлекет басшысының Жарлығына сәйкес 15 наурызда Қазақстан Республикасының жаңа Конституциясын қабылдау бойынша республикалық референдум өткізу жоспарланған.