Алтыналмас компаниясы кеніште өлі табылған адамның өз қызметкері екенін жоққа шығарды

«Алтыналмас» компаниясы түсініктемені өзінің ресми парақшасында жариялады. Алтын өндіру компаниясы басылымдарда аталған тұлға олардың қызметкері емес екенін және болмағанын хабарлады.

— Қолда бар ақпаратқа сәйкес, аталған тұлға «Қазақалтын Технолоджи» ЖШС аумағында жұмыс істейтін «Саланг» жекеменшік күзет-тыңшылық агенттігі ЖШС-де күзетші болып жұмыс істеген. Қазақстан Республикасының еңбек заңнамасының нормалары, сондай-ақ жеке деректерді қорғау туралы заңдарға сәйкес қызметкерлерге қатысты оқиғалар туралы ресми ақпаратты жұмыс беруші өз өкілеттігі шегінде ұсынады. Осыған байланысты «Саланг» ЖКТА ЖШС заң бөлімі тиісті түсініктемелерді берді. «Алтыналмас» АҚ-ның бұл оқиғаға ешқандай қатысы жоқ. Сонымен бірге компания өз құзыреті шеңберінде объективті және кешенді тергеуді қамтамасыз ету үшін мемлекеттік органдарға қажетті көмек көрсетуге дайын, - делінген «Алтыналмас компаниясының ресми мәлімдемесінде.

Еске сала кетсек, Ақмола облысындағы шахтадан жұмысшының денесі табылғанын хабарладық. Оқиға бойынша суицид фактісімен қылмыстық іс қозғалды.

Бұл – өңірдегі шахталарда тіркелген соңғы уақыттағы үшінші қайғылы жағдай. Бұған дейін Ақмола облысындағы шахтада заңсыз алтын іздеушілер опырылып қалған кен астында қалып, бір адам қаза тауып, екеуі ауруханаға жеткізілген болатын.

Сондай-ақ бұған дейін Бестөбе кентіндегі кеніш шахтасында белгісіз ер адамның мәйіті табылып, полиция оның жеке басын анықтаған еді.